"Şəhidlər Ölməz, Vətən Bölünməz" adlı tədbir keçirildi
27 sentyabr 2021-ci il tarixində 323 nömrəli tam orta məktəbin Uşaq Birliyi Təşkilatı rəhbəri Quliyeva Suğranın təşkilatçılığı ilə IV "a" sinfində " Şəhidlər Ölməz, Vətən Bölünməz" adlı Anım Günü ilə bağlı tədbiri keçirildi.
Tədbir Azərbaycan Dövlət himninin səsləndirilməsi, şəhidlərimizi bir dəqiqəlik sükutla yad etməklə başladı.
Tədbiri giriş sözü ilə açan məktəbin direktoru vəzifəsini müvəqqəti icra edən Aybəniz Orucova bu qələbənin Müzəffər ordunun Müzəffər Ali Baş Komandanı cənab İlham Əliyevin uzaqgörən siyasətinin, hərbi sahəsindəki dərin bilikləri hesabına, şücaətli Azərbaycan oğullarının, güclü Azərbaycan ordusunun, dəmir yumruq kimi birləşən Azərbaycan xalqının ədalətsizlik üzərində, haqq savaşında tarixi, əzəmətli qələbəsi olduğunu vurğuladı. Məhz bu səbəbdəndir ki, Müzəffər Ali Baş Komandanımız bu ili 44 günlük misilsiz qələbəmizin şərəfinə "Zəfər ili" elan etdiyini vurğuladı. Qəlbimizdə qürur, eyni zamanda da kədər hissi ilə qeyd etdiyimiz bu gün haqqında IV "a" sinif şagirdləri öz çıxışlarında ətraflı məlumat verdilər. Ölkəmizin gələcəyi olan körpə fidanlar 44 günlük şərəfli tariximizə nəzər yetirdilər. Şəhidlərimizin canları, qanları ilə Qarabağ torpağını canlandırdıqları, nura qərq etdikləri vurğuladılar. Şagirdlərimizin Vətənimizə, bayrağımıza, şəhidlərimizə həsr etdiyi şeirlərdə qalib ölkənin, qalib vətənpərvər vətəndaşı olduqları hiss olunurdu.
Çıxış üçün söz məktəbin Uşaq Birliyi Təşkilatı Rəhbəri Suğra Quliyevaya verildi. O, bu qələbənin şəhidlərimizin canı hesabına qazanıldığını, bu torpaqların bizə onların əmanəti olduğunu qeyd etdi.
Daha sonra söz məktəbin təlim- tərbiyə işləri üzrə direktor müavini Xəyalə Qasımovaya verildi. O, illərdir hər sevincli günümüzdə kədərimizin gözlərimizdən sızıldığını, lakin bu ilin ötən illərdən fərqli olduğunu vurğuladı. Zəfərimiz, qalibiyyətimizin parlaq siması olan ən uca ali rütbəyə yüksələn şəhidlərimizin ruhu qarşısında baş əydiyimizi qeyd etdi.
Sonda söz məktəbin direktor əvəzi A.Orucovaya verildi. O, şəhidlərimizi heç bir zaman unutmayacağımızı, onların xatirəsini hər zaman qəlbimizdə yaşadacağımızı vurğuladı. Bu dəyərli günü yüksək səviyyədə təşkil etdiyi üçün məktəbin UBTR-i Suğra Quliyevaya, IV "a" sinif rəhbəri Tərlan İsmayılovaya təşəkkürünü bildirdi.
