Gənclər Günü münasibətilə tədbir keçirildi
2 fevral - Gənclər Günü münasibətilə Microsoft Teams platforması üzərində məktəbin 11 "a" sinfində tədbir keçirildi. Məktəbin Azərbaycan dili və ədəbiyyat müəllimi Ayşən Cəfərlinin təşkilatçılığı ilə keçirilən tədbirdə məktəbin direktoru Arizə Mahmudova, 11 a sinfinin sinif rəhbəri Səadət Hacıyeva da iştirak edib.
Tədbir Azərbaycan Respublikası Dövlət himninin səsləndirilməsi ilə başladı.
Tədbirdə ilk öncə A.Cəfərli çıxış etdi. O, çıxışı zamanı gənclərin cəmiyyət üçün dəyərindən, onların ölkənin gələcək müqəddəratı üçün oynadığı rolundan danışdı. Gənc nəslin vətənpərvərlik ruhunda tərbiyə olunması onun mənsub olduğu xalqın rifahının, ölkənin çiçəklənməsinin əsas rəhni olmasından söhbət açdı.
Tədbirdə öz qəhrəmanlıqları ilə dastana dönən gənclərimiz anıldı. Onların ömürlərinin ən gözəl çağında Vətən uğrunda canlarından keçmələri, bu xalqın dinc yaşaması üçün özlərini sipər etmələri heç bir zaman unudulmayacağı vurğulandı. 44 günlük müharibədə qazanılan qələbə sağlam düşüncəli savadlı dünyagörüşlü gənclik yaratmaq üçün hələ Ulu öndərimiz Heydər Əliyev tərəfindən 1996-cı il fevralın 2-də keçirilən I Forumda qarşıya qoyulmuş məqsədə çatıldığını ürək rahatlığı ilə deməyə əsas verir.
Daha sonra məktəbin "Kiçik Akademiya"sının üzvü olan 11 "a" sinif şagirdlərindən Əhməd Mustafayev, Şahin Kərimli, Aminə Məhərrəmova, Cəfər Səfərlinin çıxışları dinlənildi. Onlar prezidentimiz İlham Əliyevin ölkəmizin gənclərinin ixtisaslarının artırılmasına, inkişaf etmiş demokratik ölkələrin təcrübələrinə yiyələnmələri üçün göstərdiyi qayğıları diqqətə çatdıraraq qətiyyətlə bildirdilər ki, təməli Ulu öndər Heydər Əliyev tərəfindən qoyulan və Cənab İlham Əliyevin uğurla apardığı daxili və xarici siyasətini alqışlayır, bu siyasətin icrasında daim onun yanındadırlar.
