"Qəribsəmiş Qubadlı" adlı tədbir keçirildi
Bu gün məktəbin ibtidai sinif müəllimi, həmçinin 2 "b" sinfinin sinif rəhbəri Həsənova Şöhlə müəllimin təşkilatçılığı ilə Microsoft Teams platforması üzərində "Qəribsəmiş Qubadlı" adlı geniş tədbir keçirildi.
Tədbirdə məktəbin direktoru Arizə Mahmudova, Azərbaycan dili və ədəbiyyat müəllimi Vahid Əsgərov, ingilis dili müəllimi Tərlan Rüstəmova, Vətən müharibəsində könüllü olaraq iştirak edən qəhrəman məzunlarımız Əsgərzadə Elmin Vahid oğlu, Həsənzadə Allahverdi Etimadi oğlu və 2 "b" sinfinin şagirdləri iştirak edirdi.
Tədbirdə çıxış üçün ilk söz məktəbin direktoru A.Mahmudovaya verildi. A.Mahmudova ilk öncə tədbir iştirakçılarını salamladıqdan sonra Vətən müharibəsi şəhidlərinə Allahdan rəhmət diləyərək, döyüşlərdə yaralanan qazilərimizə isə tezliklə şəfa dilədi.Daha sonra bu tədbirin təşkilatçısı Şöhlə müəllimə minnətdarlığını bildirərək belə tədbirlərdə iştirak edərək şagirdlərin bu cür qəhrəman oğullarımızla canlı ünsiyyət saxlaya bildikləri üçün şanslı olduqlarını vurğuladı.
Daha sonra çıxış üçün söz Ə.Vahid müəllimə, Vətən müharibəsinin könüllü iştirakçısı olan qəhrəman məzunlarımız E.Əsgərzadə, A.Həsənzadəyə verildi. Vətənpərvər məzunlarımız çıxışları zamanı 44 günlük müharibədə keçdikləri döyüş yolundan bəhs edərək, "Dəmir yumruq" əməliyyatı ilə mənfur düşmən üzərində əldə olunan Qələbənin Azərbaycanın Ali Baş komandanı Cənab İlham Əliyevin apardığı uğurlu siyasətin, Azərbaycan xalqının birliyinin, Azərbaycan Ordusunun rəşadətinin, şəhidlərimizin canı, qanı sayəsində əldə etdiklərini vurğuladılar. Daha sonra onlar 2 "b" sinif şagirdlərinin verdikləri sualları cavablandırdılar.
Tədbir Qubadlı şəhəri haqqında video təqdimatın nümayişi, şagirdlərin Qubadlının ərazisi, əhalisi, işğal və işğaldan azad olunması tarixi haqqında məlumatları verməklə, Vətən haqqında müxtəlif şeirlər səsləndirmələri ilə davam etdi.
Daha sonra 2 "b" sinif şagirdi İ.Zəhra Vətən müharibəsində şəhid olan yaxın qohumu, Dövlət Xüsusi Təyinatlı Qüvvələri dəstəsinin kəşfiyyatçısı Pərviz Məmmədli haqqında tədbir iştirakçılarına geniş məlumat verdi, ürək sözlərini söylədi. Sinifin şagirdi olan Sadiq və sinif yoldaşları Qubadlı şəhəri və kəndləri uğrunda döyüşən igid oğullarımızdan, şəhid, qazilərimizdən bəhs etdilər.
Tədbirin sonunda şagirdlər Qarabağa aid çəkdikləri rəsmləri nümayiş etdirdilər.
