26 noyabr Azərbaycan Kəlağayısı Günüdür!
26 noyabr Azərbaycan Kəlağayısı Günü münasibətilə məktəbimizdə günümüz bu dəyərli ənənəyə uyğun şəkildə keçirildi. Müəllimlərimiz dərslərdə kəlağayı taxdılar, şagirdlər isə kəlağayı ilə əyləşərək milli irsimizə bir addım daha yaxın oldular. Dərslər zamanı şagirdlərə kəlağayının mənşəyi, hazırlanma texnikası və Azərbaycan mədəniyyətindəki rolu haqqında məlumat verildi.
Kəlağayı, ipəkdən hazırlanan və xüsusi naxışlarla bəzədilən milli baş örtüsüdür. Onun naxışlarında su, günəş və həyat ağacı kimi simvollar milli dəyərlərimizin əksidir. UNESCO tərəfindən qeyri-maddi mədəni irs siyahısına daxil edilmiş kəlağayı, Azərbaycan mədəniyyətinin simvolu olaraq dünya səviyyəsində tanınır.
Bu cür günlər, həm şagirdlərdə, həm də müəllimlərdə milli kimliyimizə bağlılıq hissini daha da gücləndirir. Azərbaycan kəlağayısı – mədəniyyətimizin və gözəlliyimizin əbədi simvoludur!
