Məktəbdə "SON ZƏNG " qeyd olunub
14 iyun tarixində məktəbdə Azərbaycan Respublikası Təhsil Nazirinin müvafiq əmrinə uyğun olaraq "Son zəng" tədbiri keçirildi.Tədbirdə müəllimlər, cari tədris ilinin məzunları, məktəb rəhbərliyi və qonaqlar iştirak etdi.
Günün qəhrəmanları- 2020-2021-ci tədris ilinin məzunları öz yerlərini aldıqdan sonra Azərbaycan Respublikasının Dövlət himni səsləndi.
Tədbirdə çıxış edən məktəbin direktoru Xatirə Hacıyeva 2020-2021-ci tədris ilinin qısa təhlilini verdi, il boyu qazanılmış uğurlardan danışdı.O, Vətən müharibəsində şəhid olan məzunları anaraq, bütün şəhidlərin ruhunun bir dəqiqəlik sükutla yad edilməsini tədbir iştirakçılarından xahiş etdi.
Ənənəvi Son Zəng tədbirlərindən fərqli olaraq əsasən rəsmi olan tədbirdə müəllimlər, məzunlar və valideyinlər təbriklərini çatdırdılar.Daha sonra buraxılış imtahanlarında yüksək bal toplamış məzunlar diplomlarla təltif olundu.
Tədbirin sonunda 11b sinif şagirdi, buraxılış imtahanlarında məktəb üzrə ən yüksək bal toplamış Şəfa "Bilik açarı"nı 10-cu siniflərə təqdim etdi.
Tədbir son zəngin çalınması ilə yekunlaşdı.
