Şəhid məzun, mayor Murad Məmmədovun anım günü
28 noyabr 2024-cü il tarixində Suraxanı rayon Heydər Əliyev Mərkəzində məktəbin məzunu şəhid pilot, mayor Murad Yaşar oğlu Məmmədovun anım gününə həsr edilmiş “ Biz sizdən öyrənirik qəhrəmanlığı” adlı tədbir keçirildi. Tədbirdə şəhidin ailə üzvləri, İcra Hakimiyyətinin nümayəndəsi, şəhid ailələri, YAP Suraxanı rayon təşkilatının sədri və sədr müavini, Vətən müharibəsi veteranları, məktəbin müəllim və şagirdləri, sinif yoldaşları və silahdaşları, o cümlədən rayon ictimaiyyətinin nümayəndələri iştirak etdilər. Tədbir Vətən uğrunda canından keçən şəhidlərimizin əziz xatirəsini bir dəqiqəlik sükutla yad etməklə başlandı, Azərbaycan Respublikasının Dövlət Himni səsləndirildi. Şəhid Murad Məmmədovun həyat yolundan bəhs edən videoçarx nümayiş olundu. Milli Məclisin deputatı Qaya Məmmədov, YAP Suraxanı rayonu təşkilatının sədri Vüqar Seyidov, Suraxanı rayon İcra Hakimiyyətinin şəhid ailələri ilə işin təşkili şöbəsinin müdiri Elmar Hüseynov, şəhidin sinif yoldaşı, AMEA Prezidentinin köməkçisi, filologiya üzrə fəlsəfə doktoru Həcər Vəliyeva, şəhidin döyüş yoldaşlarından Sərhəd Xidmətinin kapitanı Məhəmməd Cəfərov, şəhidin həyat yolundan bəhs edən kitabın müəllifi, Azərbaycan Yazıçılar Birliyinin üzvü, “ Qızıl qələm” mükafatı lauriatı, şair – publisist İmran Qasımov, Suraxanı rayon şəhid ailələri cəmiyyətinin sədri Nəsibə Əliyeva, məktəbin direktoru Sevinc Hüseynova və İnşaat kollecinin direktor müavini Muxtar Həsənov çıxışlarında qeyd etdilər ki, şəhidlik vətənpərvərliyin ən ali məqamıdır, eyni zamanda hünər və qeyrət simvoludur. Bu ucalığa yüksələnlərin ömür yolu bəzən qısa olsa da, həm şərəfli, həm də hər kəs üçün nümunəvi yoldur. Əsrlər ötəcək, nəsillər bir-birini əvəz edəcək, ancaq bizə qələbə sevinci bəxş edən şəhidlərimiz, torpaq uğrunda canını fəda etmiş oğul və qızlarımız heç vaxt unudulmayacaq. Müqəddəs şəhidlik məqamına yüksələnlər aramızda olmasalar da, ürəklərimizdə hər zaman yaşayacaqlar. Böyüməkdə olan gənc nəsli layiqli Azərbaycan vətəndaşı kimi yetişdirmək, şəhidlərimizin keçdiyi həyat yolunu öyrətmək bizim hər birimizin borcudur. Murad Məmmədovun timsalında igid oğulları olan Vətən yenilməzdir, məğlubedilməzdir və güclüdür.
Şəhid pilot, mayor Murad Məmmədovun ailəsi şəhid ailələrinə göstərilən qayğıya görə Dövlətimizə və xalqımıza öz təşəkkürlərini bildirdilər.
Tədbirin bədii hissəsində məktəbin istedadlı şagirdlərinin ifasında şeir, mahnı kompozisiyaları, kiçik səhnəciklər və rəqs kompozisiyası nümayiş etdirildi.Tədbir iştirakçıları şəhid pilot, mayor Murad Məmmədovun rəsm əsərlərindən ibarət sərgi ilə tanış oldular.
