Milli Qəhrəman polkovnik-leytenant Murad Mirzəyevin xatirəsi yad edildi
Məktəbin fəaliyyət planına uyğun olaraq aprel şəhidi Azərbaycanın Milli Qəhrəmanı Murad Mirzəyevin əziz xatirəsi yad edildi. O, 1976-cı ilin 31 martında Sabirabad rayonunun Muğan Gəncəli kəndində anadan olub. Cəmşid Naxçıvanski adına Hərbi liseydə təhsil alan Murad Mirzəyev daha sonra təhsilini Türkiyədə davam etdirib və 1998-ci ildə Türkiyədə Ali Hərbi Məktəbi bitirib. O, Azərbaycan ordusunun zabiti kimi ABŞ, Rumıniya və İordaniyada keçirilən hərbi təlimlərdə iştirak edib. 2016-cı ilin mayında Azərbaycan Respublikasının ərazi bütövlüyünün qorunub saxlanması, erməni işğalçılarının 2016-cı il aprelin 2-dən 5-dək qoşunların təmas xəttində törətdikləri silahlı təxribatların qarşısının alınması və düşmənin dinc əhaliyə hücumlarının dəf edilməsi zamanı qəhrəmancasına şəhid olan Xüsusi Təyinatlı Qüvvələrinin polkovnik-leytenantı Murad Telman oğlu Mirzəyev prezident İlham Əliyevin sərəncamı ilə Milli Qəhrəman adına layiq görülüb.
Murad Mirzəyev 2016-cı il aprelin 11-də II Fəxri Xiyabanda dəfn olunub.
Məktəbin 5 "C "sinfində şagirdlər arasında Şəhidlərin tanıdılması məqsədilə Azərbaycanın Milli qəhrəmanı, aprel şəhidi Murad Mirzəyevə həsr olunan dərs keçirildi. Onlar şəhidin xatirəsini bir dəqiqəlik sükutla yad etdilər. Daha sonra şəhidin həyatından bəhs edən video slaydlar göstərildi.
