Elimizə bahar gəlir!
Baharın gəlişi yurdumuzda əsl toy-bayrama çevrilir. Xalqımız qərinələr boyu yaşatdığı, təbiət oyananda pişvazına çıxdığı Novruzu xonçalarla, göyərtdikləri səmənilərlə, bişirdikləri paxlava, şəkərbura ilə qarşılayırlar. Kosa və Keçəl Novruz şənliklərində min cür məzhəkə çıxarır, ev-ev, oba-oba gəzib pay toplayır, hamıya xoş niyyət bildirirlər. Xalqımızın bu gözəl adət-ənənəsi şagirdlərimizin həmişə sevincinə səbəb olur. Səbirsizliklə bu gözəl bayramı gözləyir, texnologiya dərslərində hazırladıqları gözəl əl işlərini nümayiş etdirməyə tələsirlər. Onların düzəltdikləri Novruz kompozisiyaları biri-birindən maraqlı və rəngarən olur, göz oxşayır. Bu kompozisiyalarda Novruzun bütün adət-ənənələrini canlandırılır, çəkdikləri rəsmlərdə, toxuduqları tikmələrdə, bəzədikləri xonçaların hər birində Novruz nəfəsi, bahar ovqatı duyulur. Şagirdlərimiz böyük həvəslə hazırladıqları bu əl işləri ilə Nəriman Nərimanəv adına parkda keçirilən Novruz şənliyinə qoşuldular. Milli paltar geyinmiş məktəblilərimiz söylədikləri şeirlərlə, oxuduqları mahnılarla onları seyr etməyə gələn Nərimanov Rayon İcra Hakimiyyətinin rəhbərliyinə, Millət vəkillərinə, xalqımızın müstəqilliyi uğrunda vuruşmuş qəhrəman oğullarımıza - bir sözlə, bütün qonaqlara sevinc bəxş etdilər.
