Davamlı inkişafımızın təməli Qurtuluş Günündən başlayır
Hər il olduğu kimi bu il də 15 İyun Milli Qurtuluş Günü Xətai rayonunda təntənəli şəkildə qeyd olundu. Rayon İcra Hakimiyyətinin təşkilatçılığı ilə Heydər Əliyev Parkında təşkil olunan tədbirdə rayon İcra Hakimiyyətinin rəhbərliyi, huquq-mühafizə orqanlarının, təhsil, səhiyyə, mədəniyyət sahələrinin kollektivləri, veteran və gənclər təşkilatlarının üzvləri, rayon ictimaiyyəti və KİV nümayəndələri iştirak etdilər. Tədbir iştirakçıları ilk öncə Ulu Öndərin abidəsi önünə tər çiçəklər düzdülər. Daha sonra rayon İcra Hakimiyyətinin başçısı Razim Məmmədov çıxış edərək bu günün əhəmiyyətindən, Azərbaycan xalqının xilaskarı, Ulu Öndər Heydər Əliyevin o ağır dövrdə qətiyyətli fəaliyyəti nəticəsində Azərbaycanın daxili və xarici düşmənlərinin ölkəmiz üçün hazırlanmış planlarını puça çıxarmasından və tez bir zamanda inkişaf yoluna başlamasından danışdı. Məhz dünya şöhrətli siyasətçi Heydər Əliyevin qətiyyətli siyasi kursu, neft strategiyası, bütün sahələrdə həyata keçirdiyi davamlı islahatlar tezliklə ölkəmizi dünyanın aparıcı dövlətlərindən birinə çevirdi. Bu gün də bu dahi şəxsiyyətin siyasi kursunun layiqli davamçısı möhtərəm Prezidentimiz cənab İlham Əliyevin apardığı davamlı siyasət Azərbaycanımızı regionun lider dövlətinə, dünyada öz yeri və nüfuzu olan bir ölkəsinə çevirib. Eləcə də ölkənin birinci xanımı Heydər Əliyev Fondunun prezidenti Mehriban xanım Əliyevanın fəaliyyəti nəticəsində Azərbaycan mədəniyyəti, tarixi dünyada tanınır. Bu gün Azərbaycan ən mötəbər beynəlxalq tədbirlərə ev sahibliyi edir və dünyanın ən tolerant ölkələr sırasındadır. Tədbirdə çıxış edən edənlər o dövrün tarixi hadisələrindən, Azərbaycanın bu gün əldə etdiyi nailiyyətlərdən danışdılar.Tədbir tanınmış incəsənət ustalarının və özfəaliyyət kollektivlərinin bayram konserti ilə davam etdi.
