" 31 Mart- Azərbaycanlıların Soyqırımı günüdür"
Tarix olub keçənləri xatırlamaq, baş vermiş hadisələri yadda saxlamaq üçün deyil, tarixin qanlı səhifələrindən ibrət dərsi götürmək üçündür. Bu ibrət dərsi isə düşmənə qarşı amansız olmaq, qazandığımız nailiyyətləri qoruyub saxlamaq, itirdiklərimizi geri qaytarmaqdır. Bütün bunları gənc nəslə çatdırmaq məqsədi ilə 31 Mart-Azərbaycanlıların Soyqırımı günü ilə bağlı tarix müəllimlərinin təşkilatçılığı ilə onlayn tədbir keçirildi. Tədbirdə məktəb liseyin direktoru N.Mahmudov, Tərbiyə işləri üzrə direktor müavini F.Əliyeva və 8l sinfinin şagirdləri iştirak etdilər.
Təqdimatlarda tarix müəllimləri Qafqazda azərbaycanlılara qarşı məqsədyönlü şəkildə həyata keçirilən etnik təmizləmə və soyqırım siyasətindən, 1918-ci ildə Bakıda və Azərbaycanın digər bölgələrində ermənilərin törətdikləri vəhşiliklərdən, 31 Mart Soyqırımın bəşər tarixində baş verən ən qanlı faciələrdən biri kimi tarixə düşdüyündən danışdılar.
Şagirdlərin hazırladıqları məruzələr dinlənildi, videoçarx nümayiş olundu.
Sonda məktəb liseyin direktoru N.Mahmudov cıxış edərək söylədi ki, tarixin neçə-neçə sınaqlarından şərəflə çıxan xalqımız faciələrdən, soyqırımlardan sarsılsa da qırılmayıb, əksinə daha güclü, qüdrətli dövlətin qurulmasında əzmkarlıq, mübarizlik ruhunu artırıb. İgid oğullarımız 44 günlük II Qarabağ müharibəsində bunu sübut etdilər,düşmənə sarsıdıcı zərbə endirərək qələbə qazandılar, işğal altında olan torpaqlarımızı azad edərək ərazi bütövlüyümüzü bərpa etdilər.
