"Bilik günü" qeyd olundu
Bu gün paytaxtın bütün ümumi təhsil məktəblərində olduğu kimi, 234 nömrəli tam orta məktəbdə də, “Bilik günü” qeyd olundu.
Tədbirdə Bakı şəhəri üzrə Təhsil İdarəsinin müdir müavini Nərgiz xanım Səfərova, Xəzər rayon Gənclər və İdman İdarəsinin rəisi Vüqar Əliyev, Buzovna qəsəbə nümayəndəliyinin sədri Baləmi Cəmilov iştirak etdi.
Tədbir Azərbaycan Respublikasının Dövlət himninin səsləndirilməsi ilə başladı. Məktəbin direktoru Könül xanım Məmmədli çıxış edərək yeni tədris ilində qarşıya qoyulan məqsədlərdən, təhsil sahəsində aparılan islahatlardan, dövlətimizin təhsilə olan qayğısından, məktəb məzunlarının qəbul imtahanlarındakı uğurlarından bəhs etdi.
Gələn qonaqlar yeni dərs ilinin başlanması münasibətilə məktəbliləri, valideynləri və müəllimləri təbrik edib, onlara uğurlar arzuladılar.
Sonra məktəblilərin iştirakı ilə mahnılar və rəqslərdən ibarət konsert proqramı təqdim olundu. Tədbirdə fənn olimpiadalarında, bilik yarışmalarında iştirak edərək yüksək nəticə əldə edən şagirdlər, ali məktəblərə qəbul imtahanında yüksək bal toplayaraq ali məktəbə qəbul olan məzunlar və şagirdləri müxtəlif fənn müsabiqələrində uğur qazanan müəllimlər məktəb rəhbərliyi tərəfindən fəxri fərmanlarla təltif olundular.
