234 №-li tam orta məktəb

“Məktəblərdə Füzuli ayı” çərçivəsində məktəbimizin Kiçik Akademiyasının və Azərbaycan dili və ədəbiyyat metodbirləşməsinin təşkilatçılığı ilə “Söz mülkünün sultanı” adlı elmi konfrans keçirilmişdir.. Konfransı giriş sözü ilə məktəbin direktoru Zülfiyyə Məmmədhüseynova açaraq dünya ədəbiyyatı xəzinəsinə misilsiz əsərlər bəxş edən Məhəmməd Füzulinin 530 illiyi ilə əlaqədar şagirdlərimizin böyük şairin əsərlərinə müraciət etmələrini təqdir etdiyini xüsusi vurğulamışdır. Sonra KA-nın rəhbəri - əməkdar müəllim Kəmalə Əliyeva Şərq poeziyasının nadir incilərini yaratmış Məhəmməd Füzulinin yaradıcılığı haqqında qısa məlumat vermişdir. KA üzvləri şairin əsərlərinin tədqiqinə həsr olunmuş məruzələrini təqdim etmişlər.

Azərbaycan dili və ədəbiyyat metodbirləşməsinin növbəti iclasında Azərbaycan Respublikasının Elm və Təhsil Nazirliyi tərəfindən 19 may tarixində ümumtəhsil müəssisələrinin VI sinif şagirdləri üçün nəzərdə tutulmuş monitorinqə hazırlıq, Məktəbin Fəaliyyət Planına əsasən 5-ci siniflərdə keçiriləcək məktəbdaxili monitorinqə hazırlıq haqqında danışılmış, "Məktəblərdə Füzuli aylığı" çərçivəsində metodbirləşmənin tədbirlər planı müzakirə olunmuşdur.

Bakı Şəhəri üzrə Təhsil İdarəsi tərəfindən “Yaşıl dünya naminə həmrəylik ili”nə həsr olunmuş “Bütöv Azərbaycana ilk bahar gəlir” adlı bayram festivalı keçirilib.

Paytaxtdakı 229 nömrəli tam orta məktəbdə təşkil olunan festivalda Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin (BŞTİ) müdiri vəzifəsini müvəqqəti icra edən Nərminə Hüseynova, millət vəkilləri Sadiq Qurbanov, Məlahət İbrahimqızı, İltizam Yusifov, Könül Nurullayeva, Səbinə Xasayeva, Elm və Təhsil Nazirliyinin Daxili nəzarət şöbəsinin müdir müavini Kamran İsmayılov, Nizami Rayon İcra Hakimiyyəti başçısının müavini İldırım Mehdiyev, şair Baba Vəziroğlu, BŞTİ-nin struktur bölmə rəhbərləri, Nizami Rayonu İcra Hakimiyyətinin nümayəndələri, məktəb direktorları, məktəbdənkənar təhsil müəssisələrinin rəhbərləri, müəllimlər və şagirdlər iştirak ediblər.

Öncə qonaqlar festival çərçivəsində keçirilən ağacəkmə aksiyasında iştirak ediblər.

Daha sonra Novruz adət-ənənələrini canlandıran və müxtəlif bölgələrimizi tərənnüm edən guşələrə baxış keçirilib.

Çıxış edənlər festival iştirakçılarını xalqımızın milli bayramı olan Novruz münasibətilə ürəkdən təbrik edib, firavanlıq və xoş günlər arzulayıblar. Bildirilib ki, digər illərdən fərqli olaraq bu il Novruz bayramı ərazilərinin tam suverenliyinə nail olmuş Azərbaycanda qeyd edilir. Uzun illər sonra bütöv Azərbaycanın Novruzu qeyd etməsini Ali Baş Komandan İlham Əliyevin böyük sərkərdəlik məharətinə, güclü iradəsinə və qətiyyətinə, müzəffər və yenilməz ordumuzun şücaətinə borcluyuq.

Qeyd olunub ki, BŞTİ-nin tabeliyindəki ümumi təhsil müəssisələrində xalqımızın qədim tarixini, milli adət və ənənələrini  gənc nəslə daha yaxından tanıtmaq, təbliğ etmək məqsədilə müxtəlif tədbirlər keçirilir. Bu istiqamətdə reallaşdırılan “Dəyərlərimizi qoruyaq!” layihəsi çərçivəsində təşkil olunan “Bütöv Azərbaycana ilk bahar gəlir” adlı bayram festivalı milli-mənəvi dəyərlərimizə, tariximizə, köklərimizə nə qədər bağlı olmağımızın bariz nümunəsidir.

 Tədbir iştirakçıları festivalın “Yaşıl dünya naminə həmrəylik ili”nə həsr olunmasını yüksək qiymətləndiriblər. Bildiriblər ki, şagirdlərin burada səsləndirdikləri mahnılar və şeirlər, həm də ətraf mühitin sağlamlaşdırılması, yaşıllıqların bərpası və artırılması ilə bağlı ötürülən gözəl mesajlardır.

Tədbirdə şagirdlər və Uşaq-Gənclər İnkişaf mərkəzlərinin dərnək üzvləri baharın təravətli nəfəsini özü ilə gətirən Novruz bayramına aid mahnılar ifa edib, yallı gedib, şeirlər səsləndirib, maraqlı səhnəciklər və digər özfəaliyyət bacarıqlarını nümayiş etdiriblər.

Sonda məktəbin həyətində bayram tonqalı qalanıb və qonaqlar şagirdlərlə birgə “Cəngi” sədaları altında dövrə vurublar.

"Azərbaycan dili və ədəbiyyatı aylığı" çərçivəsində növbəti tədbir keçirilib. Azərbaycan dili və ədəbiyyat metodbirləşməsi və məktəb KA-nın birgə təşkilatçılığı ilə keçirilən "Mənim doğma dilim" adlı intellektual yarışmada məktəbin 10-cu sinif şagirdlərindən ibarət 4 komanda ("Zəka", "Ziya", "Kamal", "Bilik") intellektlərini sınamış, "Bilik" komandası qalib gəlmişdir. Yarışma zamanı tamaşaçılar üçün də suallar səsləndirilmiş, fərqlənənlər kitab hədiyyəsi ilə mükafatlandırılmışlar.

Məktəbin direktoru Zülfiyyə Məmmədhüseynova II və III yerə layiq görülən komandaları fəxri fərmanla, qalib komandanı isə həm də kubokla təltif etmişdir. O çıxışında vurğulamışdır ki, bu intellektual yarışma "Azərbaycan dili və ədəbiyyat aylığı"na gözəl məntiqi sonluq oldu.

Təhsil müəssisələri və uşaq-gənclər inkişaf mərkəzlərində Xocalı soyqırımının otuz ikinci ildönümünə həsr edilən tədbirlər keçirilib.

Tədbirlər Azərbaycanın müstəqilliyi uğrunda canlarını qurban vermiş şəhidlərin və Xocalı qurbanlarının əziz xatirəsinin bir dəqiqəlik sükutla yad edilməsi ilə başlayıb.

Tədbirlərdə böyüməkdə olan nəslə XX əsrin ən dəhşətli hadisələrindən olan Xocalı soyqırımı haqqında ətraflı məlumat verilib, Xocalı faciəsinin Azərbaycanın ictimai-siyasi fikir tarixində əsas yerlərdən birini tutduğu, onun dünyaya tanıdılması işinin dövlətimizin daim diqqət mərkəzində olduğu bildirilib.

Vətən müharibəsində şanlı qələbənin qazanılması, lokal antiterror əməliyyatları nəticəsində Müzəffər Ali Baş Komandan İlham Əliyev tərəfindən əzəli torpaqlarımız olan Xankəndi, Xocavənd, Xocalı, Ağdərə və Əsgəranda üçrəngli bayrağımızın ucaldılması ilə ölkəmizin suverenliyinin bərpasının tam təmin olunmasının qürurverici hiss olduğu, torpaqlarımızın işğaldan azad olunması ilə bütün şəhidlərimizin, o cümlədən Xocalı qurbanlarının qanlarının yerdə qalmadığı şagirdlərin nəzərinə çatdırılıb.

Həmçinin təhsil müəssisələrində soyqırımı şahidləri, həlak olmuş şəxslərin ailə üzvləri ilə görüşlər təşkil edilib. Xocalı soyqırımına həsr olunan xüsusi dərslər, ədəbi-bədii kompozisiyalar, şagirdlərin əl işlərindən ibarət rəsm sərgiləri keçirilib, sənədli və bədii filmlər nümayiş olunub.

Bundan əlavə, təhsil müəssisələrinin müəllim və şagird kollektivi  “Ana harayı” abidəsini ziyarət ediblər.