Unutmuruq, unutdurmuruq!
12.03.2018 tarixdə məktəbin şəhid məzunu Emin Əliyevin anadan olmasının 44-cü ildönümü münasibətilə “Ünutmuruq, unutdurmuruq!” adlı tədbir keçirilmişdir. Məktəbin Azərbaycan dili və ədəbiyyat müəllimi Kəmalə Əliyevanın (əməkdar müəllim) VI-XI sinif şagridləri ilə birlikdə hazırladığı bu anım tədbirində şəhidin qısa, lakin mənalı həyat yoluna nəzər salınmış, ona həsr olunmuş şeirlər ifa olunmuş, vətənpərvər ruhlu mahnılar səsləndirilmişdir.
Tədbirdə şəhidin anası İbadət xanım Əliyeva, Buzovna kəndinin axundu Hacı Soltan Əlizadə, şairə-jurnalist Gülarə Munis çıxış edərək Vətən uğrunda ölməyin - şəhidliyin uca zirvə olması, şəhidlərə dinimizdə verilən yüksək dəyər haqqında danışmış, qələbəyə olan inam hislərini ifadə etmişlər.
Məktəbin direktoru Könül Məmmədli tədbirin sonunda çıxış edərək tədbir iştirakçılarına, xüsusilə də şəhid anasına öz təşəkkürünü bildirmiş, “Cənnət anaların ayaqları altındadır!” və “Şəhidlər cənnət ruzisi yeyirlər” deyimlərinə əsaslanaraq şəhid analarının bu iki ali mərtəbəyə yüksəldikləri üçün müqəddəs olduqlarını, onların qarşısında baş əydiyini vurğulamışdır.
