Biologiya üzrə bilik yarışı
Məktəbimizin biologiya müəllimi Samirə Musayevanın təşkilatçılığı ilə şagirdlər arasında biologiya üzrə bilik yarışı keçirildi. Yarışın məqsədi şagirdlərin elmi biliklərini möhkəmləndirmək, biologiyaya olan marağını artırmaq və onların sağlam rəqabət mühitində öz biliklərini sınamasına şərait yaratmaq idi.
Fərqli siniflərdən seçilmiş komandalar arasında keçirilən bu bilik yarışı gərgin və maraqlı anlarla yadda qaldı. Şagirdlər müxtəlif mövzuları əhatə edən sualları cavablandırmaqla yanaşı, həm də məntiqi düşünmə, sürətli qərarvermə və komanda işi bacarıqlarını nümayiş etdirdilər.
Yarışın sonunda qalib komanda diplom və hədiyyələrlə təltif olundu. Digər iştirakçılara da fəallığa görə təşəkkürnamələr təqdim edildi.
Belə tədbirlər şagirdlərimizin elmi biliklərini artırmaqla yanaşı, onlarda təbiətə, canlılara və ətraf mühitə qarşı daha məsuliyyətli münasibət formalaşdırır. Biologiya müəllimi Samirə Musayevaya təşəkkür edirik və gələcəkdə də bu cür təşəbbüslərin davamlı olmasını arzulayırıq.
