"Şərəfli müəllim ömrü"
Səbail rayonu H.Mahmudbəyov adına 2 nömrəli texniki-humanitar elmlər liseyində əsaslı təmirdən sonra ilk tədbir həyata keçirildi. Belə ki, 5 oktyabr "Müəllim günü" münasibətilə liseyin akt zalında bir qrup müəllimin rəğbətlənməsi ilə bağlı keçirilən tədbiri açıq elan edən direktor Bəkir Mustafayev liseyin təmiri və təmirdən sonra yüksək əhval-ruhiyyə ilə dərs ilinə başlanması ilə bağlı müəllimlərə məlumat verdi.
Sonra tədbiri ərsəyə gətirən direktor müavini Nuranə Şıxəliyeva müəllimləri təbrik edərək bir qrup müəllimə fəxri fərmanları təqdim etdi.
Liseyin coğrafiya müəllimi Şərafət Hüseynli Prezidentimizin təqdimatı əsasında layiq görüldüyü "Əməkdar müəllim" fəxri adı alması münasibətilə təbrik olundu.
"Əsgərə xatirə kitabı" layihəsi çərçivəsində keçirilmiş və Azərbaycan Respublikası Müdafiə Nazirliyi tərəfindən rəğbətləndirilmiş müəllimlər də fəxri fərmanlarla təltif olundular.
Sonda V sinif şagirdlərinin təqdimatında müəllimlər üçün hazırlanmış bədii hissə təqdim olundu.
