2 nömrəli Texniki Humanitar lisey

Pedaqoji Şura iclası keçirilib

27.06.2024-cü il tarixində 2023/2024-cü tədris ilinin sonuncu Pedaqoji Şura iclası keçirilib.

1.2023-2024-cü tədris ilinin yekun hesabatları

2.Şagirdlərin sinifdən-sinfə keçirilməsi

3.Ümumi orta təhsil səviyyəsi üzrə attestatların verilməsi

4.Tam orta təhsil səviyyəsi üzrə attestatların verilməsi

Pedaqoji Şura iclasında geridə qoyulan tədris ili ərzində əldə olunan nəticələr müzakirə olunmuş, növbəti tədris ilində bu nəticələrin yaxşılaşdırılması üçün qərarlar qəbul edilmişdir

Bakı Şəhəri üzrə Təhsil İdarəsi (BŞTİ) tərəfindən paytaxtın təhsil müəssisələrinin iştirakı ilə “Məktəblinin yay mütaliəsi” adlı layihəsinə start verilir.

Layihənin əsas məqsədi şagirdlərin yay tətili günlərində asudə vaxtlarının səmərəli təşkili, mütaliəyə maraqlarının artırılması, kitab mübadiləsi mədəniyyətinin genişləndirilməsi, oxu bacarıqlarının inkişaf etdirilməsi və nitq vərdişlərinin təkmilləşdirilməsindən ibarətdir.

Layihə çərçivəsində paytaxtın təhsil müəssisələri şagirdlərin oxuduğu kitabları əks etdirən fotoşəkilləri, yaxud oxuduqları əsər və onun müəllifi ilə bağlı fikirlərinə dair videogörüntüləri məktəbin sosial şəbəkə hesablarında #məktəblininyaymütaliəsi haşteqi ilə paylaşması nəzərdə tutulur.

Qeyd edək ki, layihə sentyabr ayına qədər davam edəcək.

İyun ayının on birində 8A sinfi Səadət müəllim və Gülnar müəllimlə birlikdə Azərbaycanın Milli Qəhrəmanı Mübariz İbrahimovun məzarını ziyarət ediblər.

Məlumat üçün bildirmək istəyirik ki, 8A sinif şagirdləri M.İbrahimov haqqında yazılmış "Qisas gecəsi" əsərini oxuyub müzakirə ediblər.

Məlumdur ki, M.İbrahimov iyunun 18-dən 19-na keçən gecə qəhrəmancasına döyüşərək şəhid olmuş, İkinci Fəxri Xiyabanda dəfn olunmuşdur. Allah ona, həmçinin bütün şəhidlərimizə rəhmət eləsin!

Şagirdlərdə mütaliəyə həvəs yaratdığı, onlara vətənpərvərlik hissləri aşıladığı üçün Azərbaycan dili və ədəbiyyat müəllimi Gülnar Hümbətovaya, sinif rəhbəri Səadət Əlizadəyə minnətdarıq.

SON ZƏNG 

Hər anı bir ömrə bərabər 11 ili sonlandıran zəng.

Ömrümüzün ən şirin, duyğulu və qayğısız günlərinin birləşdiyi məktəb illəri "Son zəng"in sədaları altında bitir. Bu zəngin sədaları isə ən çox 11-in qəlbinin simlərini titrədir. Bu zəng ilə 11-lər tənəffüs üçün dəhlizə yox, müstəqil həyat üçün yeni mərhələyə qədəm qoyurlar.

İyunun 14-də ölkəmizin bütün yerlərində "Son zəng"tədbiri keçirilib.Eləcə də bizim liseydə təşkil edilmiş "Son zəng"tədbiri dövlət himni ilə başlayıb.Sonra 44 günlük Vətən müharibəsində öz qanları ilə tarix yazan şəhidlərimizin ruhu bir dəqiqəlik sükutla yad edilib.

Tədbirin səbəbkarları olan məzunlar maraqlı çıxışları ilə tədbirə gözəllik qatıblar.

SON ZƏNG tədbirimizin fəxri qonağı Tibb elmləri doktoru,oftalmoloq professor Paşa Qəlbinur oldu.

Professor məzunlarımızı səmimi arzularla təbrik etdi.

Biliklərin xəzinəsi olan "Açar" Xl sinif şagirdlərinin iştirakı ilə beşincilərə təqdim edilib.Beşincilər isə lisey direktoruna təhvil verərək,onların yollarını inamla davam etdirəcəklərinə söz veriblər.Liseyin bir qrup məzunları lisey rəhbərliyi tərəfindən "Fəxri Fərman"la təltif olunub.

Sonda məzunların iştirakı ilə sonuncu zəng çalınıb.

Əziz məzunlar,bir daha təbrik edir,uğurlar arzulayırıq.Yolunuz açıq olsun!.

İyunun 21-də dövlət ümumi təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinə başlanılıb.

Qaydalara müvafiq olaraq, test imtahanı ilə bağlı məlumat 15 may tarixində iştirakçıların şəxsi kabinetlərinə göndərilib.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrində çalışan 2 379 təhsilverən sertifikatlaşdırma prosesinin test imtahanı mərhələsinə  dəvət olunub.

Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin müdiri vəzifəsini müvəqqəti icra edən Nərminə Hüseynova və BŞTİ-nin müvafiq struktur bölmə rəhbərləri imtahan mərkəzinə gəlib və müəllimlərə öz tövsiyələrini verib, uğurlar arzulayıb.

Qeyd edək ki, test imtahanı mərhələsində 120 dəqiqə müddətində təhsilverənlərin tədris etdiyi fənn üzrə ümumi təhsil proqramlarına, tədris metodikasına və təlim strategiyalarına aid 60 sual təqdim edilir. Hər düzgün cavab 1 balla qiymətləndirilir. Bu mərhələnin nəticələri üzrə balların hesablanması avtomatlaşdırılmış rejimdə proqram təminatı vasitəsilə həyata keçirilir və imtahan başa çatdıqdan dərhal sonra namizədin kompüterinin ekranında görünür.

Nəzərinizə çatdırırıq ki, test imtahanında mümkün 60 baldan minimum 30 bal toplamış təhsilverənlər sertifikatlaşdırmanın müsahibə mərhələsinə iştirak hüququ qazanacaq.

Xatırladaq ki, Nazirlər Kabinetinin 18 avqust 2022-ci il tarixli qərarına əsasən, dövlət ümumi təhsil müəssisələrinin təhsilverənlərinə sertifikatlaşdırmanın nəticəsinə uyğun olaraq tədris edilən dərs saatına görə test imtahanı mərhələsində nəticə göstərənlərin vəzifə maaşlarına əlavələr ediləcək.

Sertifikatlaşdırmada iştirak edən bütün müəllimlərə uğurlar arzulayırıq!