Bayraq Günü tədbiri
Məktəbdə Bayraq Günü ilə əlaqədar noyabr ayının 8-də böyük bir tədbir təşkil edildi. Tədbir məktəbin ədəbiyyat müəllimi Nərgiz Cəfərova tərəfindən 5"A" və 6"B" sinif şagirdlərinin iştirakı ilə hazırlanmışdır. Tədbirdə məktəb rəhbərliyinin nümayəndələri, müəllimlər, şagirdlər, valideynlər və həmçinin qonaq qismində dəfələrcə Azərbaycan bayrağını yüksəklərə qaldırmış dünya çempionu Araz Musayev iştirak etdi.
Dövlət himnimizin səslənməsilə tədbir başlandı. Şagirdlər bir-birindən maraqlı və baxımlı təqdimatlar etdilər, bayraq şousu göstərdilər, yaddaqalan səhnəciklər sərgilədilər. Milli rəqslər ifa olundu, vətənpərvər ruhda şeirlər, kompozisiyalar nümayiş edildi. Daha sonra Nərgiz müəllim çıxış edərək sözü məktəbin direktoru Kərim Abidiyə verdi. Kərim müəllim tədbirin hazırlanmasında əziyyət çəkən hər kəsə təşəkkür etdi, məktəb kollektivinə Bayraq Günü münasibəti ilə səmimi təbriklərini çatdırdı. Fəxri qonağımız Araz Musayev və hərbi rəhbər, Qarabağ qazisi İslam Əzimov da şagirdlərə onlara fərəhli və duyğulu anlar yaşatdıqları üçün təşəkkür etdilər.
