Məktəbdə Bilik Günü tədbiri keçirildi
Ölkənin bütün ümumtəhsil məktəblərində olduğu kimi 19 nömrəli tam orta məktəbdə də Bilik günü tədbiri təşkil edildi. Tədbir dövlət himninin səslənməsi ilə başlandı. İlk söz məktəbin direktoru Kərim Abidiyə verildi. Kərim müəllim 2019-2020-ci tədris ilinin başlanması münasibətilə şagird və müəllim kollektivini təbrik etdi, onlara ən səmimi arzularını çatdırdı.
Tədbirdə qonaq qismində Nəsimi rayonu İcra Hakimiyyətinin əməkdaşı Rauf İsgəndərov çıxış edərək toplantı iştirakçılarına ürək sözlərini bildirdi. Keçən tədris ilinin buraxılış və qəbul imtahanlarında yüksək nəticələr əldə etmiş məzunların çıxışları tədbiri daha da maraqlı etdi.
İstedadlı şagirdlərin rəqs nümunələri və rəngarəng ifaları tədbiri şənləndirdi. Xüsusilə, həyəcanlı görünən birincilər vətənə, müəllimə, bayrağa sevgi aşılayan şeirlər ifa etdilər və hər kəsə sevindirici anlar yaşatdılar.
Nəhayət, bu tədris ilinin ilk zəngi çalındı və məktəblilər sinif otaqlarına yollandılar.
