Novruz bayramı qeyd edildi
Bayramlar içində bir bayram var: ən əziz, ən doğma, ən sevimli bir bayram - Novruz bayramı! Uzun illər taleyinə ağrı-acı düşən, lakin unudulmayan bu bayram bizim milli bayramımızdır.
Novruz «təzə il» deməkdir, baharın ilk günüdür. Bütün türk dünyasının həyatında əsl yeni il həmin gündən başlanır. Novruzun gəlişi ilə evlərə, ailələrə yeni büsat, şadlıq və sevinc gətirir. Hamı çalışır ki, bu bayramı yüksək təntənə ilə, ürək sevinci ilə, qəlb fərəhi ilə qarşılasın. Hər evdə, hər ailədə Novruz bayramına əvvəlcədən hazırlıq gedir.
Məktəbimizdə hər il olduğu kimi Novruz bayramı münasibətilə sərgilər təşkil olunur,milli dəyərləri özündə ehtiva edən əl işləri nümayiş etdirilir,ədəbi-bədii gecələr təşkil edilir.Bu gün həmin tədbirlərdən biri məktəbimizin 9”B” sinif şagirdləri,sinif rəhbəri Zamanova Təbəssüm və məktəblinin dostları tərəfindən təşkil olundu.
Tədbir zamanı şagirdlər Novruzu tərənnüm edən şeir parçaları,nəğmələr oxudu,rəqslər ifa etdilər.Keçəllə Kosanın məclisə gəlməsi tədbiri daha da şənləndirdi.Milli geyimli qızların səhnəcikləri hər kəsin xoşuna gəldi.Novruz adətlərinin qorunub saxlanması və gələcək nəsillərə ötürülməsi hər birimiz üçün xüsusi əhəmiyyət kəsb etməlidir.
Tədbirimizin sonunda məktəbin direktoru Akif Əliyev çıxış edərək bütün müəllim və şagird kollektivini qarşıdan gələn Novruz bayramı münasibəti ilə təbrik etdi və tədbirin təşkilatçılarına təşəkkürünü bildirdi.
