Gücümüz birliyimizdir
Dekabr ayının 30 - da Microsoft Teams platforması üzərindən Dünya Azərbaycanlılarının Həmrəylik Gününə həsr edilmiş video görüş keçirildi. Tədbirin təşkilatçısı, direktor müavini Ülviyyə Məmmədova toplantı iştirakçılarını salamladıqdan sonra bu bayramın tarixi köklərini açıqlamaq üçün sözü məktəbin tarix müəllimi Vəfa Heydərovaya verdi. Dərin məzmunlu çıxış edən Vəfa müəllimə tariximizdə təəssüf hissi doğuran, torpağımızı, xalqımızı parçalayan Gülüstan və Türkmənçay müqavilələrinə toxundu. Ulu Öndər Heydər Əliyevin dünya azərbaycanlılarını birləşdirmək səylərindən danışdı.
Daha sonra 10 "A" sinif şagirdləri maraqlı tarixi faktlara əsaslanan məsələlər barədə təqdimatlar göstərdilər. Birliyimizə, həmrəyliyimizə həsr edilmiş şeirlər ifa etdilər.
Həmçinin tədbir zamanı ölkə prezidenti cənab İlham Əliyevin Dünya Azərbaycanlılarının Həmrəylik Gününü hər il yüksək əhval - ruhiyyəli bayram kimi qeyd edilməsi barədə verdiyi göstərişləri diqqətə çatdırdılar.
Tədbirdə yüz nəfərə qədər müəllim və şagird iştirak etdi və onlardan bəziləri tədbir haqqında ürək sözlərini dedilər. Toplantının sonunda məktəbin direktoru Nailə Cəfərova geniş çıxış edərək bir daha Həmrəylik Günü və Yeni il münasibəti ilə məktəb kollektivini təbrik etdi. 2020-ci ilin yadda qalan məqamlarından danışan Nailə müəllimə Vətən müharibəsində qazandığımız tarixi zəfərin məhz xalqın birliyi, həmrəyliyi nəticəsində ərsəyə gəldiyini bir daha qeyd etdi. Bizə azadlıq sevincini yaşadan şəhidlərimizə Allahdan rəhmət, qazilərimizə isə can sağlığı arzuladı.
