20 Yanvar
Qara Yanvar — 1990-cı il yanvarın 19-dan 20-nə keçən gecə, saat 23.30-da Bakı şəhərinə keçmiş Sovet İttifaqının qoşun hissələri fövqəladə vəziyyət elan edilmədən yeridilmiş, dinc əhaliyə divan tutulmuş, yüzlərlə insan qətlə yetirilmiş, yaralanmış və itkin düşmüşdür. Bu hadisə Azərbaycanda müstəqillik hərəkatını sürətləndirdi və Sovet İttifaqına ciddi zərbə vurdu.Bütün Bakı əhalisi gecə qətlə yetirilənlərin kütləvi dəfn mərasiminə toplaşdı. Onlar şəhərin hündür hissəsində salınmış Şəhidlər Xiyabanında basdırılan ilk şəhidlər oldular.
Bu gün məktəbimizdə müstəqilliyimizi öz qanları, canları bahasına qazanan 20 Yanvar şəhidlərinin əziz xatirəsinə həsr edilmiş silsilə tədbirlər keçirildi. İlk dərs saatları 20 Yanvar – Ümumxalq Hüzn Gününə həsr edildi, siniflərdə şəhidlərin ruhu yad edildi və söhbətlər aparıldı. Bununla yanaşı məktəbdə “20 Yanvar hüzn günümüz deyil, qürur günümüzdür” adlı inşa – yazı və foyedə, “20 Yanvar şəhidlərinə həsr olunmuş rəsmlərdən ibarət stend təşkil olundu. Hər bir sinifdə Ümumxalq Hüzn Gününü əks etdirən divar qəzetləri tərtib olunmuşdur. Tariximizin şanlı səhifəsi "20 Yanvar" şəhidlərinin xatirəsini yad etmək üçün məktəbin müəllim və şagird kollektivi Şəhidlər Xiyabanını ziyarət etmişdir. Onlar şəhidlər üçün ucaldılmış "Əbədi Məşəl" adlı abidənin önünə əklil qoymuş, məzarları ziyarət etmişlər.Bütün bunlarla yanaşı bu gün tarix müəllimi Abdullayeva Familənin təşkilatçılığı ilə “Tariximizin şanlı səhifəsi” adlı tədbir keçirildi. Tədbir şəhidlərimizin xatirəsinin bir dəqiqəlik sükutla yad edilməsi ilə başladı və daha sonra bu günün tariximizdə əhəmiyyəti ilə bağlı geniş məlumat verildi. Şəhidlər haqqında slaydfilmin nümayişi ilə davam edən tədbirdə VII və X sinif şagirdləri şeirlər söylədilər, səhnəcik göstərdilər.Sonda şagirdlərin birgə ifasında oxuduqları vətənpərvərlik mahnısı ilə tədbir yekunlaşdı.
Bugünkü müstəqilliyimiz şəhidlərin həyatı bahasına qazanılıb. Allah şəhidlərimizə rəhmət eləsin!
