Bu bayraq enməz, Vətən bölünməz!
07.11.2015-ci il tarixində məktəbimizdə "Bayraq" gününə həsr olunmuş tədbir keçirildi. Tədbir "Bu bayraq enməz, Vətən bölünməz" şüarı altında keçirildi. Tədbirdə məktəbin direktoru, müəllimlər, valideynlər, direktor müavinləri, eləcə də məktəbin hərbi müəllimi də iştirak edirdi. Məktəbin alman dili müəllimi və 7F sinfinin sinif rəhbəri Məhərrəmova Afaq böyük qürur hissi ilə tədbiri təşkil etmişdi. Belə ki, onun rəhbərlik etdiyi sinfin şagirdləri hər zaman vətənpərvər ruhlu tədbirlərə daha həvəslə və ürəkdən hazırlaşırlar. Onu da qeyd edək ki, son üç ildə Afaq müəllimə məktəbdə keçirilən tədbirlərin təşkilində fəallıq göstərərək öz yanaşma tərzi, pedaqoji ustalığı peşəkarlığı ilə seçilmişdir. Bunu bugünkü tədbirdə onun şagirdlərinin bayrağımıza, vətənimizə, xalqımıza bağlılığını əks etdirən çıxışları bir daha sübut etdi.Tədbirdə tarixi məlumatların araşdırılması və toplanıb təqdimat halına salınmasına kömək edən məktəbin tarix müəllimi Qarayeva Arzu xanıma 7F sinif şagirdləri öz adlarından təşəkkür etdilər. Yekun sözü məktəbin direktoru Kəmalə xanım Şıxlinskaya söylədi. O, öz çıxışında müəllim və şagirdlərə öz müqəddəs işlərində daim belə məsuliyyətli və uğur əldə etməyi arzuladı, öz şagirdləri ilə fəxr etdiyini söylədi.
