"BALACA FİDANLAR”IN HESABAT TƏDBİRLƏRİ KEÇİRİLDİ
07-11 may tarixlərində məktəbdə 1"Ç” sinif müəllimi Nigar Canıyeva, 1"D”sinif müəllimi Səidə Abdullayeva və 1"C” sinif müəllimi İradə Seyfəliyevanın rəhbərliyi və sinif şagirdlərinin iştirakı ilə sinif hesabat tədbirləri keçirildi. Tədbirlərdə BŞTİ-nin əməkdaşı Fərman Abdullayev, məktəbin müdiriyyəti, müəllimlər, valideynlər və şagirdlər iştirak edirdilər. Balaca fidanlar böyük həvəslə, səhnəciklər qurub, şeirlərlə, mahnılarla çıxış edərək bütün tamaşaçıların rəğbətini qazandılar. Uşaqlar oxumaqla yanaşı, adət-ənənələrimizi də necə gözəl öyrəndiklərini nümayiş etdirdilər. Ümid edirik ki, bu ilin birinciləri təhsil pillələrini uğurla qalxacaq, ölkəmizin adını yüksəklərə qaldıraraq gələcəyin maarifpərvər ziyalılarından olacaqlar.
Tədbirin sonunda məktəbin direktoru Nazilə Əliyeva şagirdləri təbrik etdi, onlara xoş məktəb illəri, Vətənimizə layiqli övlad olmaqlarını arzuladı.