MƏKTƏB ŞAGİRDLƏRİ QALA ARXEOLOJİ-ETNOQRAFİK MUZEY KOMPLEKSİNDƏ OLDULAR
21 apreldə məktəbin 5,,D" sinif şagirdləri ingilis dili müəllimi Mərcanə Qurbanovanın rəhbərliyi ilə ,,Qala Arxeoloji-Etnoqrafik Muzey Kompleksi”ndə ekskursiyada oldular. ,,Qala Arxeoloji-Etnoqrafik Muzey Kompleksi” 2008-ci ildə Heydər Əliyev Fondunun dəstəyi ilə Bakının Xəzər rayonunun ərazisindəki qədim Qala kəndində yaradılmışdır. Muzeyə gələnlər burada Qala kəndinin qədim tarixi ilə tanış olurlar. Dünyanın açıq səma altında yaradılmış nadir muzeyləridən olan Qala Arxeoloji-Etnoqrafik Muzey Kompleksidə eramızdan əvvəl III minillikdən bu günə qədər Qala kəndində yaşayan əhalinin həyat tərzi, kurqanlar, sərdabələr, yaşayış evləri, qədim qəsrin qalıqları, 5 məscid, 3 hamam və sair canlı olaraq qorunub saxlanılmışdır. Dulusçuluq, çörəkbişirmə sexləri orta əsrlərdəki kimi bu gün də fəaliyyət göstərir. Qala abidə kompleksində Tunc dövrünə aid qayaüstü və qayaaltı yaşayış məskənləri, qayaüstü təsvirlər, qədim özüllər, ibtidai divar qalığı, X-XIV və X-XV əsrlərə aid Xəzər dənizi və Bakı şəhəri istiqamətində iki yeraltı yol, XVIII əsrin yadigarı təndir, Qavaldaş, keramika, məişət və bəzək əşyaları, silah və sikkələr, qədim yaşayış kompleksinin konservasiya olunmuş qalıqları və sair nümayiş etdirilir. 2011-ci ildə Qala Muzey Kompleksinin ərazisində Qala İnformasiya Mərkəzi, Etno-Ekoloji Mərkəz, Əntiq Əşyalar Muzeyi yaradılmış və fəaliyyətə başlamışdır. Muzeyin əməkdaşları şagirdlərə milli-mənəvi dəyərlərimiz, onların mühafizə edilməsi, təbliğ olunması haqqında geniş məlumat verdilər. Məktəblilər bu ekskursiyadan xoş xatirələrlə ayrıldılar.
