NOVRUZ BAYRAMINA HƏSR OLUNMUŞ SİLSİLƏ TƏDBİRLƏR
Milliliyi, milli-mənəvi dəyərləri yaşatmaq, milli xüsusiyyətləri şagirdlərə aşılamaq, milli bayramlarımızı dünyaya tanıtmaq məqsədi ilə 15, 16 və 18 mart tarixlərində məktəbdə Novruz bayramına həsr olunmuş növbəti tədbirlər keçirilmişdir. Tədbirlər 2,,C”, 1 ,,F” və 4,,D” sinif müəllimləri Tənzilə Salahova, Xəyalə Babayeva və Zülfiyyə Rzayevanın rəhbərliyi ilə təqdim olunmuşdur. Aparıcılar tədbiri açıq elan etdikdən sonra Novruzun atributlarından olan “Su”, “Od”, “Yel”, “Torpaq” çərşənbələr ardıcıllıqla səhnəyə çıxdılar və özlərinə xas olan əlamətləri ifadə edərək çərşənbələr haqqında söhbət açdılar. “Elimizə bahar gəlir” mahnısının sədaları altında “Bahar qızı” səhnəyə dəvət olundu. Sonra Kosa və Keçəl məzəli oyunlarla məclisi şənləndirdilər. Yazın gəlişi ilə əlaqədar qeyd olunan bu bayram günlərində kiçikyaşlı məktəblilər çox gözəl tədbir nümayiş etdirdilər. Gözəl səhnə tərtibatı əsl yaz günlərindən xəbər verirdi. Məktəblilərin ifasında səslənən şeir, musiqi nömrələri, göstərilən səhnəciklər tamaşaçılar tərəfindən alqışlarla qarşılandı. Kiçik yaşlı məktəblilərin istedadı hər kəsi heyran qoydu.
Tədbirdə məktəb müdiriyyəti, müəllimlər, valideynlər və şagirdlər iştirak edirdilər.
Sonda məktəbin direktoru Nazilə Əliyeva çıxış edərək, bütün tədbir iştirakçılarını Novruz bayramı münasibətilə təbrik etdi.