Şəhid məzunumuz Cəlalın anım mərasimi
Məmmədyarov Cəlal Cavad oğlu 1974 – cü il yanvar ayının 24 – də Bakı şəhərinin Sabunçu qəsəbəsində anadan olmuşdur. Orta təhsilini 155 saylı tam orta məktəbdə almışdır. 1992 – ci ildə doğma Azərbaycanımızın torpaqları uğrunda qanlı savaşlar getdiyi bir vaxtda Hərbi Xidmətə çağrılmışdır. Bu müddətdə xidməti qiymətləndirilərək dəfələrlə komandanlıq tərəfindən təşəkkürə layiq görülmüşdür. Elə döyüş olmazdı ki, Cəlal orada fədakarlıq etməsin. Həmişəki döyüşlərdən qətiyyən fərqlənməyən savaşların birində - Füzulinin Horadiz qəsəbəsi uğrunda gedən döyüşdə Cəlal Məmmədyarov azğın düşmənin gülləsinə tuş gəldi. Bu 1995 – ci il iyun ayının 29 – da oldu. Düşmən gülləsi ilə ağır yaralanmış Cəlal döyüş dostlarının qolları arasında həyatla əbədi olaraq vidalaşdı, əbədiyyətə qovuşaraq şəhidlik zirvəsinə ucaldı.Ölümündən sonra xidməti layiqli qiymətləndirilərək adı əbədiləşdirilmiş, oxuduğu 155 saylı tam orta məktəbə Cəlalın adı verilmişdir. Onun adı, igidliyi yaddaşlara köçərək xatirələrdə dərin iz qoyacaq.
