ADA Universitetində III beynəlxalq elm və təhsil konfransı keçirildi
"ADA" Universitetində Avropa İttifaqının Azərbaycandakı nümayəndəliyinin dəstəyi ilə “Təhsilin strateji planlaşdırılması: düşüncələr və perspektivlər” mövzusunda III beynəlxalq elm və təhsil konfransı keçirildi.
Tədbirdə təhsil naziri Ceyhun Bayramov, Dövlət İmtahan Mərkəzinin Direktorlar Şurasının sədri Məleykə Abbaszadə, ali məktəblərin rektorları, beynəlxalq ekspertlər, KİV nümayəndələri iştirak etdilər.
151 nömrəli tam orta məktəbin ibtidai sinif müəllimi Məlahət Abdullayevada həmin konfransın iştirakçısı olmuşdur.
Tədbiri giriş sözü ilə açan "ADA" Universitetinin prorektoru Vəfa Kazdal qeyd etmişdir ki, ikigünlük konfransın əsas məqsədi 2013-cü ilin oktyabrında ölkə Prezidenti cənab İlham Əliyevin imzaladığı "Azərbaycan Respublikasında təhsilin inkişafı üzrə Dövlət Strategiyası"nın həyata keçirilməsindən ötən son beş il ərzində əldə edilmiş nəticələrin beynəlxalq təcrübə ilə müqayisədə təhlili və müzakirəsini aparmaqdır. Vəfa Kazdal elmi konfransa 50-dən çox tədqiqat işinin təqdim olunduğunu, onlardan 15-nin Elmi Şura tərəfindən bəyənildiyini, konfransın gedişində iştirakçılara təqdim olunacağını bildirdi.
