Yeni ilə həmrəylik duyğuları ilə
Dünya Azərbaycanlılarının Həmrəylik Günü–Azərbaycan millətinin birlik şüarının simvolik günüdür. Bu bayram dünyanın bütün ölkələrində yaşayan azərbaycanlılarla əlaqələr qurmaq, onlar arasında birlik və həmrəylik yaratmaq işində mühüm rol oynayır. Xalqımız bu əlamətdar bayramı üzun illərdən bəri yaranmış, qorunub saxlanmış ənənələrinə, mədəniyyətinə, tarixi köklərinə xas olan xoş amallarla, duyğularla keçirir. 28 dekabr 2017-ci il tarixində 151 nömrəli tam orta məktəbdə Dünya Azərbaycanlılarının Həmrəylik Günü və Yeni il bayramı münasibətilə tədbir keçirildi. Tədbiri açıq elan edən Arzu Quliyeva qeyd etdi ki, ölkəmizdə bütün millətlər bir-biri ilə mehribanlıq şəraitində yaşayır və doğma Azərbaycanın çiçəklənməsi üçün çalışır. Sonra şagirdlərin ifasında vətənə həsr olunmuş şeirlər, Azərbaycan xalq rəqsləri, xor kollektivinin çıxışı tədbirə xüsusi rəng qatdı. 5b sinif şagirdi Aydan Həmzəyevanın ifasında xalq mahnıları dinlənildi. Tədbirin sonunda balaca rəssamların əl işlərinə baxış keçirildi.
