Qələbəyə gedən yol
6 aprel 2017-ci il tarixdə Bakı şəhəri Nəsimi rayonu 151 nömrəli tam orta məktəbdə 2016-cı il aprel döyüşlərində şəhid olmuş əsgər və zabitlərimizin əziz xatirəsinə və aprel qələbələrinin ildönümünə həsr edilmiş tədbir keçirildi. Tədbiri giriş sözü ilə açan məktəbin direktoru Kifayət Tanrıverdiyeva bildirdi ki, ötən ilin aprel ayında baş vermiş döyüşlər zamanı Milli Ordumuz qüdrətini bir daha nümayiş etdirdi. Qeyd edildi ki, tədbirin keçirilməsində məqsəd ötən ilin aprel ayında baş vermiş döyüşlərdə şəhid olmuş oğullarımızın əziz xatirəsini yad etmək, qəhrəmanlıq göstərmiş igid əsgər və zabitlərimizin şücaətindən bəhs etmək, belə övladlarımızın gənc nəsillərə əsl örnək olduqlarını aşılamaqdır. Bildirildi ki, aprel döyüşləri bizim şanlı hərbi qələbəmizdir, dövlətimizin, xalqımızın, ordumuzun gücünü göstərən qələbədir. Aprel döyüşləri nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində bu gün Azərbaycan bayrağı dalğalanır. Daha sonra aprel döyüşlərində Vətən uğrunda qəhrəmancasına həlak olmuş hərbçilərimizin və mülki şəxslərin əziz xatirəsi bir dəqiqəlik sükutla yad edildi. Bakı şəhəri Nəsimi Rayon İcra Hakimiyyəti başçısının müavini Anar Tağıyev, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü, Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli, Ehtiyatda Olan Zabitlər Konfederasiyasının sədr müavini Həsən Əmirov, aprel döyüşlərinin iştirakçıları kapitan Rəşad Həşimov, gizir Ülfət Həsənov, gizir Natiq Mehdiyev, şəhid Müşviq Orucovun, şəhid Mahir Quliyevin, şəhid Mahmud İbrahimovun ailə üzvləri və digər çıxış edənlər də vurğuladılar ki, Ermənistan Silahlı Qüvvələrinin təxribatlarına cavab olaraq Azərbaycan Ordusu ötən il aprel ayının əvvəllərində əks-hücum əməliyyatları ilə düşmənin layiqli cavabını verib, Füzuli, Cəbrayıl və Ağdərə rayonlarının işğal altında olan strateji əraziləri azad edilib. Sonda məktəbin şagirdləri şəhidlərin xatirəsinə həsr olunan ədəbi-bədii kompozisiya ilə çıxış etdilər. Tədbirdə aprel qələbələrini əks etdirən rəsm əsərlərindən ibarət sərgiyə baxış da oldu.
