“Ceyhun Hacıbəyli haqqında nə bilirik” adlı dəyirmi masa
151 nömrəli tam orta məktəbdə Ceyhun Hacıbəylinin 125 illik yubileyi ilə əlaqədar bir çox tədbirlər həyata keçirilmişdir. Məktəbdə Ceyhun Hacıbəylinin naşirlik fəaliyyətinə həsr edilən guşə hazırlanmış, fotostend tərtib edilmişdir. “Ceyhun Hacıbəyli və Azərbaycan mətbuatı” mövzusunda X siniflərin iştirakı ilə disput təşkil edilmişdir. Qeyd edilənlərlə yanaşı “Ceyhun Hacıbəyli haqqında nə bilirik” mövzusunda IX sinif şagirdlərinin iştirakı ilə dəyirmi masa keçirilmişdir. Əvvəlcə şagirdlər Ceyhun bəy Hacıbəyli haqqında bildikləri məlumatları müzakirə etmişlər. Sonra isə bilmədikləri məlumatları müəllimlərindən dinləmişlər. Belə ki, məktəbin tarix müəllimi Qeydafə İbrahimxəlilova Ceyhun bəy Hacıbəylinin həyat yolu haqqında, Hacıbəyovlar nəslinin görkəmli nümayəndələri olan Üzeyir Hacıbəyli, Zülfüqar Hacıbəyov, Soltan Hacıbəyov haqqında geniş məlumat verərək şagirdləri məlumatlandırmışdır. O, Ceyhun bəy Hacıbəylinin ömrünün sonuna kimi Azərbaycanın azadlığı uğrunda var qüvvəsi ilə çalışmasını və unuda bilmədiyi vətəninə, sevimli xalqına yorulmadan xidmət etməsini xüsusilə vurğulamışdır. Azad müstəqil Azərbaycan uğrunda yenilməz mübariz Ceyhun bəy Hacıbəyli heç zaman unudulmayacaq, daim qəlblərdə, ürəklərdə yaşayacaqdır.
