86 №-li tam orta məktəb

   Təhlükəsiz məktəb şagirdlərin, müəllimlərin və məktəb kollektivinin digər üzvlərinin özlərini fiziki, psixoloji və sosial baxımdan tam sərbəst hiss etdikləri yerdir. Qeyd olunanları nəzərə alaraq Mübariz Nəcəfov adına 86 nömrəli tam orta məktəbdə valideynlərlə maarifləndirici seminar keçirilib. Məktəbin direktoru Cavid Əliyev təhlükəsizlik tədbirləri ilə bağlı məktəbdə həftənin bir gününün təhlükəsizlik günü elan ediləcəyini, həmin gün monitorinqlərin aparılacağını bildirib. Həmçinin Cavid Əliyev siniflərdə şagirdlərin çantalarına baxış keçiriləcəyi barədə valideynlərə məlumat verib. Seminarda məktəb psixoloqu Şəfəq Soltanova tərəfindən risk qrupunda olan şagirdlərlə aparılan işlərin nəticələri barədə sinif rəhbərlərinə məlumatlar verildiyi də valideynlərin nəzərinə çatdırılıb.

   Azərbaycan Naşirlərinin I Forumu çərçivəsində “Oxu Günü-10” layihəsi “Azərbaycan Nəşriyyatları Assosiasiyası” İctimai Birliyi, AMEA, Təhsilin İnkişafı Fondu, Mədəniyyət Nazirliyi, Yunus Əmrə İnstitutu və “Hədəf Nəşrləri”nin birgə təşkilatçılığı ilə AMEA parkında keçirilib. Sərgi-festivalda Varis, Rüstəm Behrudi, Elxan Elatlı, İlqar Kamil, İlham Tumas, Elay, Tamerlan İsmayılzadə, Aynur Cavid, Ramil Əhməd, Məsudə Cabbar, Erix Qauzer, Fidan Cəfərzadə və başqa tanınmış yazıçıların təqdimat və imza mərasimləri olub. Layihənin məqsədi ölkədə kitabçılığı inkişaf etdirmək, gənclərin intellektual mühitə adaptasiyasını aktual saxlamaq, oxucu-yazıçı görüşlərini stimullaşdırmaq, endirimli kitablar təqdim etmək və bununla kitabın əhəmiyyətini cəmiyyətə aşılamaqdan ibarətdir.

   Mübariz Nəcəfov adına 86 nömrəli tam orta məktəbin 5a sinif şagirdləri tarix müəllimi Samirə Şıxəliyevanın rəhbərliyi ilə “Oxu Günü-10” sərgi-festivalında fəal iştirak ediblər.

   Təhsilalanların ekoloji maarifləndirilməsi, bu sahə üzrə biliklərinin və tədqiqatçılıq bacarıqlarının artırılması, istedadlı və yaradıcı şagirdlərin aşkara çıxarılması, müəllim-şagird əməkdaşlığının inkişafı, təbiət fənlərinin digər fənlərə inteqrasiyasının təşkili, ətraf mühitin və ekologiyanın mühafizəsi, təbii sərvətlərin qorunması və onlardan səmərəli istifadə edilməsi, müvafiq qlobal problemlərin həllinə dəstək verilməsi məqsədilə ümumtəhsil müəssisələrində Yaşıl layihə: “Təbiəti qoruyanlar” layihəsinin keçirilməsi nəzərdə tutulub.

   Mübariz Nəcəfov adına 86 nömrəli tam orta məktəbin 7d sinif şagirdləri tarix müəllimi Ayşəm Həsənovanın rəhbərliyi ilə layihə çərçivəsində "Təbiəti qoruyanlar" mövzusunda müxtəlif təqdimatlar hazırlayıblar. Həmçinin bu il “Yaşıl dünya naminə həmrəylik ili”nə əsasən    şagirdlər məktəbin həyətində müxtəlif bitkilər əkərək, onlara qulluq ediblər.

   Respublika Uşaq-Gənclər İnkişaf Mərkəzinin təşəbbüsü, Məktəbəqədər və Ümumi Təhsil üzrə Dövlət Agentliyinin dəstəyi ilə Respublika səviyyəli “Yallı: güc, harmoniya və birlik simvolu” adlı məktəblilər üçün “Akvarium” formatında ictimai dinləmə və müzakirə tədbiri keçirilib. Hibrid formatda təşkil olunmuş tədbir uşaq və gənclərdə Azərbaycanın ən qədim rəqs növlərindən olan yallıya, milli folklora maraq oyatma, onun tarixi və məzmunu barədə məlumatlanma və onları bu incəsənət növünə yönəltmə məqsədini daşıyır.

   Mübariz Nəcəfov adına 86 nömrəli tam orta məktəbin 7c sinif şagirdi İnci Əkbərli “Yallı: güc, harmoniya və birlik simvolu” adlı məktəblilər üçün “Akvarium” formatında ictimai dinləmə və müzakirə tədbirində münsiflər heyəti tərəfindən seçilən qaliblərin siyahısında olub. Şagirdimizi təbrik edir, gələcək həyatında uğurlar arzu edirik.

Mayın 1-dən 2024-2025-ci tədris ili üzrə ümumi təhsil müəssisələrinin birinci siniflərinə şagird qəbuluna start verilir. Qəbul prosesi www.mektebeqebul.edu.az portalı vasitəsilə aparılacaq.

Elektron portalda 1 may saat 11:00-dan uşaqların qeydiyyatı, 3 may tarixindən isə Azərbaycan bölməsi üzrə sorğuların yerləşdirilməsi (məktəb və müəllim seçimi) həyata keçiriləcək.

Mayın 3-dən 17-dək dövlət ümumi təhsil müəssisələrinin tədris digər dillərdə aparılan birinci siniflərinə qəbulla bağlı təşkil olunan müsahibəyə yazılmaq üçün qeydiyyat aparılacaq. Müsahibələr 7–30 may tarixlərində keçiriləcək. Müsahibədən uğurlu nəticə əldə edən uşaqların valideynləri 12 iyun–13 sentyabr tarixlərində məktəb və müəllim seçimi edə biləcəklər.

Birinci sinfə qəbulla bağlı digər suallarınıza müvafiq linkə daxil olaraq cavab əldə edə bilərsiniz.

Birinci sinfə sənəd qəbulu 13 sentyabr tarixinədək davam edəcək.