19 №-li tam orta məktəb

Gənclərin hərbi vətənpərvərlik tərbiyəsində müstəsna əhəmiyyəti olan “Şahin” hərbi-idman oyunu hər il ənənəvi olaraq ayrı - ayrı rayon məktəbli gəncləri arasında keçirilir. Bu il də Nəsimi rayonu məktəblərindən olan VIII - X sinif şagirdləri arasında keçirilən "Şahin" hərbi - idman yarışında məktəbimizin komandası uğurla çıxış edib. Belə ki, yarışda iştirak edən 23 nömrəli tam orta məktəbin şagirdləri birinci yeri, 19 və 211 nömrəli tam orta məktəbin şagirdləri isə müvafiq olaraq ikinci və üçüncü yerlərin qalibi olublar. Məktəbin direktoru Nailə Cəfərova, GÇHH rəhbəri İslam Əzimov və məktəbin "Şahin" komandasının üzvləri Nəsimi rayon Gənclər və İdman İdarəsinin rəhbərliyi tərəfindən 23 nömrəli tam orta məktəbdə təşkil edilən mükafatlandırma mərasimində iştirak ediblər. 

Məktəbin "Şahin" komandasının mübariz üzvlərini rayon ikinciliyi münasibətilə ürəkdən təbrik edir, uğurlarının davamlı olmasını diləyirik.

Bakı Şəhəri üzrə Təhsil İdarəsinin tabeliyindəki ümumi təhsil müəssisələri üzrə I sinfə qəbul prosesində prioritet tətbiq olunacaq məktəblərin siyahısı açıqlanıb.

Belə ki, məktəblərə şagird qəbulu sərbəst formada və prioritetə (üstünlük hüququ) əsasən aparılacaq. Sərbəst formada şagird qəbulu aparılan məktəblərə valideynlər şəxsi kabinet vasitəsilə məktəb və müəllim seçimini birbaşa edəcəklər. Prioritet (valideyn və ya uşağın məktəbin müəyyənləşdirilmiş ərazisinə (dislokasiya) qeydiyyatı olmalı, bacı-qardaşı həmin məktəbdə hazırda təhsil almalı, valideynlərindən biri həmin məktəbdə çalışmalı) üzrə valideynlər isə ilk növbədə müəyyən edilmiş müddətdə (Azərbaycan bölməsi üzrə 3 may-3 iyun 2024-cü il, tədrisi digər dillərdə aparılan bölmələr üzrə isə 12 iyun-12 iyul 2024-cü il tarixlərində) üstünlük hüquqlarından biri əsasında  sorğu yerləşdirə bilərlər. Prioritetlərin tətbiqi yaşayış sıx olan ərazilərdə valideynlərin məktəb seçimini asanlaşdırmaq məqsədlərinə xidmət edir.

Qeyd edək ki, müvafiq müddət başa çatdıqdan sonra üstünlük hüququ tətbiq olunan məktəblərdə boş qalan şagird yerlərinə sərbəst qəbul (tədrisi digər dillərdə olan və müsabiqə yolu ilə qəbul aparılan liseylər istisna olmaqla) aparılacaq.

Məlum olduğu kimi, mayın 1-də 2024-2025-ci tədris ili üzrə ümumi təhsil müəssisələrinin birinci siniflərinə şagird qəbulu üzrə uşaqların qeydiyyatına www.mektebeqebul.edu.az elektron portalı vasitəsilə start veriləcək.

Prioritet tətbiq olunan məktəblərin siyahısı:

Azərbaycan bölməsi üzrə üstünlük hüququ tətbiq olunan məktəblər

Tədrisi digər dillərdə aparılan bölmələr üzrə üstünlük hüququ tətbiq olunan məktəblər

Bakı Şəhəri üzrə Təhsil İdarəsi tərəfindən “Yaşıl dünya naminə həmrəylik ili”nə həsr olunmuş “Bütöv Azərbaycana ilk bahar gəlir” adlı bayram festivalı keçirilib.

Paytaxtdakı 229 nömrəli tam orta məktəbdə təşkil olunan festivalda Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin (BŞTİ) müdiri vəzifəsini müvəqqəti icra edən Nərminə Hüseynova, millət vəkilləri Sadiq Qurbanov, Məlahət İbrahimqızı, İltizam Yusifov, Könül Nurullayeva, Səbinə Xasayeva, Elm və Təhsil Nazirliyinin Daxili nəzarət şöbəsinin müdir müavini Kamran İsmayılov, Nizami Rayon İcra Hakimiyyəti başçısının müavini İldırım Mehdiyev, şair Baba Vəziroğlu, BŞTİ-nin struktur bölmə rəhbərləri, Nizami Rayonu İcra Hakimiyyətinin nümayəndələri, məktəb direktorları, məktəbdənkənar təhsil müəssisələrinin rəhbərləri, müəllimlər və şagirdlər iştirak ediblər.

Öncə qonaqlar festival çərçivəsində keçirilən ağacəkmə aksiyasında iştirak ediblər.

Daha sonra Novruz adət-ənənələrini canlandıran və müxtəlif bölgələrimizi tərənnüm edən guşələrə baxış keçirilib.

Çıxış edənlər festival iştirakçılarını xalqımızın milli bayramı olan Novruz münasibətilə ürəkdən təbrik edib, firavanlıq və xoş günlər arzulayıblar. Bildirilib ki, digər illərdən fərqli olaraq bu il Novruz bayramı ərazilərinin tam suverenliyinə nail olmuş Azərbaycanda qeyd edilir. Uzun illər sonra bütöv Azərbaycanın Novruzu qeyd etməsini Ali Baş Komandan İlham Əliyevin böyük sərkərdəlik məharətinə, güclü iradəsinə və qətiyyətinə, müzəffər və yenilməz ordumuzun şücaətinə borcluyuq.

Qeyd olunub ki, BŞTİ-nin tabeliyindəki ümumi təhsil müəssisələrində xalqımızın qədim tarixini, milli adət və ənənələrini  gənc nəslə daha yaxından tanıtmaq, təbliğ etmək məqsədilə müxtəlif tədbirlər keçirilir. Bu istiqamətdə reallaşdırılan “Dəyərlərimizi qoruyaq!” layihəsi çərçivəsində təşkil olunan “Bütöv Azərbaycana ilk bahar gəlir” adlı bayram festivalı milli-mənəvi dəyərlərimizə, tariximizə, köklərimizə nə qədər bağlı olmağımızın bariz nümunəsidir.

 Tədbir iştirakçıları festivalın “Yaşıl dünya naminə həmrəylik ili”nə həsr olunmasını yüksək qiymətləndiriblər. Bildiriblər ki, şagirdlərin burada səsləndirdikləri mahnılar və şeirlər, həm də ətraf mühitin sağlamlaşdırılması, yaşıllıqların bərpası və artırılması ilə bağlı ötürülən gözəl mesajlardır.

Tədbirdə şagirdlər və Uşaq-Gənclər İnkişaf mərkəzlərinin dərnək üzvləri baharın təravətli nəfəsini özü ilə gətirən Novruz bayramına aid mahnılar ifa edib, yallı gedib, şeirlər səsləndirib, maraqlı səhnəciklər və digər özfəaliyyət bacarıqlarını nümayiş etdiriblər.

Sonda məktəbin həyətində bayram tonqalı qalanıb və qonaqlar şagirdlərlə birgə “Cəngi” sədaları altında dövrə vurublar.

Təhsil müəssisələri və uşaq-gənclər inkişaf mərkəzlərində Xocalı soyqırımının otuz ikinci ildönümünə həsr edilən tədbirlər keçirilib.

Tədbirlər Azərbaycanın müstəqilliyi uğrunda canlarını qurban vermiş şəhidlərin və Xocalı qurbanlarının əziz xatirəsinin bir dəqiqəlik sükutla yad edilməsi ilə başlayıb.

Tədbirlərdə böyüməkdə olan nəslə XX əsrin ən dəhşətli hadisələrindən olan Xocalı soyqırımı haqqında ətraflı məlumat verilib, Xocalı faciəsinin Azərbaycanın ictimai-siyasi fikir tarixində əsas yerlərdən birini tutduğu, onun dünyaya tanıdılması işinin dövlətimizin daim diqqət mərkəzində olduğu bildirilib.

Vətən müharibəsində şanlı qələbənin qazanılması, lokal antiterror əməliyyatları nəticəsində Müzəffər Ali Baş Komandan İlham Əliyev tərəfindən əzəli torpaqlarımız olan Xankəndi, Xocavənd, Xocalı, Ağdərə və Əsgəranda üçrəngli bayrağımızın ucaldılması ilə ölkəmizin suverenliyinin bərpasının tam təmin olunmasının qürurverici hiss olduğu, torpaqlarımızın işğaldan azad olunması ilə bütün şəhidlərimizin, o cümlədən Xocalı qurbanlarının qanlarının yerdə qalmadığı şagirdlərin nəzərinə çatdırılıb.

Həmçinin təhsil müəssisələrində soyqırımı şahidləri, həlak olmuş şəxslərin ailə üzvləri ilə görüşlər təşkil edilib. Xocalı soyqırımına həsr olunan xüsusi dərslər, ədəbi-bədii kompozisiyalar, şagirdlərin əl işlərindən ibarət rəsm sərgiləri keçirilib, sənədli və bədii filmlər nümayiş olunub.

Bundan əlavə, təhsil müəssisələrinin müəllim və şagird kollektivi  “Ana harayı” abidəsini ziyarət ediblər.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrində 21 Fevral-Beynəlxalq Ana Dili Günü ilə əlaqədar tədbirlər keçirilib.

Beynəlxalq Ana Dili Gününün məktəblərdə qeyd edilməsində əsas məqsəd Azərbaycan dilinin tarixi inkişaf mərhələləri, rəngarəngliyi barədə şagirdlərə dolğun məlumat vermək, doğma dilimizin saflığının qorunaraq gələcək nəsillərə olduğu kimi ötürülməsinə nail olmaq, gələcəyimiz olan uşaqlara dilimizə sevgi və hörmət hissini aşılamaqdan ibarətdir.

Tədbirlərdə Beynəlxalq Ana Dili Gününün tarixindən danışılıb, özünəməxsusluğu ilə seçilən Azərbaycan dilinin keçdiyi inkişaf yoluna nəzər yetirilib. Bildirilib ki, Azərbaycan dilinin dövlət dili səviyyəsinə yüksəlməsində ümummilli lider Heydər Əliyevin tarixi xidmətləri var. Həmçinin Azərbaycan Respublikasının Prezidenti İlham Əliyevin apardığı uğurlu siyasətdə ana dilinin qorunması və zənginləşdirilməsi məsələlərinin həmişə önəmli yer tutduğu qeyd olunub.

Tədbirlərdə Azərbaycan dilinin inkişafına həsr olunmuş videoçarxlar nümayiş etdirilib. Şagirdlər ana dilimizə həsr edilən şeirlər, mahnılar söyləyib və ədəbi-bədii kompozisiyalarla çıxış ediblər.