Unudumayan Tarix
Vaxt keçdikcə, hər hansı tarixi hadisə haqqında dolğun və əhatəli fikir yürütmək daha asan olur. 33 il sonra qanlı 20 Yanvar hadisələrinin ildönümü ərəfəsində yenidən bu hadisələri təhlil etmək, onu düzgün qiymətləndirməklə, həm xalqımızın tarixində çox önəmli və məşəqqətli olaylara yenidən nəzər salırıq, həm də bu qəhrəmanlıq salnaməsinin müəlliflərini - şəhidlərimizin xatirəsini yad edirik.
1990-cı ilin Qanlı Yanvar hadisələri zamanı haqsızlıq və ədalətsizliyə qarşı öz haqq səsini ucaltmış dinc əhalinin sovet qoşunları tərəfindən amansızcasına qətlə yetirildiyi faciə yalnız Azərbaycan xalqına qarşı deyil, ümumbəşəri dəyərlərə, humanizmə qarşı törədilən cinayətdir. 1990-cı ilin yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Əksinə xalq daha da mətinləşdi və düşmənin gözünə dik baxdı. Həmin müdhiş gecədə həlak olan Vətənin oğul və qızları Azərbaycanın tarixinə parlaq səhifə yazdılar, xalqın milli azadlığı, müstəqilliyi üçün yol açdılar. Məhz buna görə də 20 Yanvar faciəsi xalqımızın azadlıq mübarizəsinin rəmzidir. Qanlı 20 Yanvar hadisələrinin 31-ci ildönümü ərəfəsində Müzəffər Ali Baş komandan cənab İlham Əliyevin məqsədyönlü siyasəti və qətiyyəti, xalqımızın vəhdəti və Silahlı Qüvvələrimizin rəşadəti nəticəsində 30 ilə yaxın əsirlikdə qalan doğma torpaqlarımız azad olundu. 44 günlük Vətən müharibəsi dövründə cəbhənin bütün istiqamətlərində düşməni darmadağın edən qəhrəman əsgər və zabitlərimizin qanı bahasına ölkəmizin ərazi bütövlüyü bərpa olundu. Sadalananlar xalqımızın qəhrəmanlıq ənənələrinə sadiqliyini nümayiş etdirməklə yanaşı, Vətənimizin müstəqilliyi və ərazi bütövlüyü uğrunda canımızdan belə keçməyə hazır olduğumuzu bir daha sübut etdi. Azərbaycan xalqı onun qan yaddaşında silinməz iz qoyan 20 Yanvar faciəsini hər il qeyd edir, öz qəhrəman övladlarının əziz xatirəsini dərin ehtiramla yad edir və bu faciəni heç vaxt unutmayacaqdır.
Binəqədi rayonu Həsən Cəbraylov adına 99 nömrəli tam orta məktəbdə 20 Yanvar faciəsinin 33-cü il dönümünə həsr olunan ədəbi bədii kompozisiya nümayiş olundu. "Unudulmayan Tarix” adlanan kompozisiya məktəbin musiqi müəllimi Sevil Zeynalovanın və bədii-qiraət dərnəyi rəhbəri Əbdüləli Abdullayevin təşkilatçılığı ərsəyə gəldi. Bədii kompozisiyaya məktəb kollektivi, qonaqlar və şagirdlər tamaşa etdilər. Tədbiri məktəbin direktor müavini və tarix müəllimi Ruslan Məhiyev açıq elan etdi. O, şagirdlərə bu qanlı faciənin tarixi haqqında məlumat verdi. Bütün Azərbaycan Şəhidlərinin ruhu bir dəqiqəlik sükutla yad edildi. Tədbir iştirakçıları faciənin mahiyyətini hazırlanan səhnəciklərdə ifa etdilər. Şagirdlər Vətənpərvərlik ruhunda şeirlər söylədilər, mahnılar səsləndirdilər. Tədbir zamanı faciəni özündə əks etdirən kitablar da sərgiləndi.
