BEYNƏLXALQ ANA DİLİ GÜNÜNƏ HƏSR EDİLMİŞ SİNİF TƏŞKİLAT SAATLARI
Ana dilimiz öz qrammatik quruluşuna görə zəngin, fonetik ahənginə görə qeyri-adi gözəlliyə malik bir dildir. Əsrlər, qərinələrdir ki, xalqımızın əbədiyaşarlığına xidmət edən ana dilimiz qədim tarixə malik olan, min illərin müxtəlif burulğanlarından alnıaçıq, üzüağ çıxaraq müasir dövrə gəlib çatmış ən böyük mənəvi sərvətimizdir. Bu gün dünyanın müxtəlif ölkələrində 50 milyondan çox azərbaycanlı yaşayır və öz ana dilində danışır.
21 fevral bütün dünyada Beynəlxalq Ana Dili Günü kimi qeyd olunur. Birləşmiş Millətlər Təşkilatı 1999-cu ilin noyabrında Banqladeş səfirinin təşəbbüsü ilə fevralın 21-ni Beynəlxalq Ana Dili Günü elan edib.
Bu məqsədlə, Azərbaycanın Milli Qəhrəmanı İlqar Mirzəyev adına 98 nömrəli məktəbin siniflərində ilk dərslər Beynəlxalq Ana Dili Gününə həsr olunub. Şagirdlər bu günə həsr olunmuş şeirlər səsləndirdilər. Müəllimlər isə Beynəlxalq Ana Dili Gününə həsr olunmuş videoçarxlar nümayiş etdirdilər, bu barədə geniş məlumat verdilər.
