Novruz gəlir, yaz gəlir
Bayramlar içində bir bayram var: ən əziz, ən doğma, ən sevimli bir bayram - Novruz bayramı! Uzun illər taleyinə ağrı-acı düşən, lakin unudulmayan bu bayram bizim milli bayramımızdır.. Novruz bayramı insanlar arasında bərabərlik, dostluq, sülh bayramı olmaqla yanaşı, milli və bəşəri dəyərlərimizi özündə əks etdirən, xalqı firavan həyata, sülhə, dostluğa çağıran zəngin, əvəzsiz yaz bayramıdır.
Pandemiyadan əvvəlki dövrdə Novruz bayramı məktəbimizdə hər il böyük təntənə və sevinclə qeyd edilmişdir. Bu il də mart ayında bayramla bağlı bir sıra işlər həyata keçirilmişdir. İlk olaraq şagirdlər arasında həm əyani, həm də onlayn formada rəsm müsabiqəsi elan edildi. Məktəbin bayramsayağı bəzədilmiş foyesində “Novruz gəlir, yaz gəlir” adlı şagirdlərimizin əl işlərindən ibarət sərgi təşkil edildi. Sinif rəhbərləri Novruz bayramının adət-ənənələri barədə onlayn sinif təşkilat saatlarında şagirdlərə məlumat verib slaydlar və videoroliklər nümayiş etdirdilər. Keçirilən bütün tədbirlərdə Novruz bayramının əhəmiyyəti, milli-mənəvi dəyərləri vurğulandı.
