44 №-li tam orta məktəb

Martın 17-də məktəbin 100 illiyi münasibətilə tədbir keçirilib.

Bir əsrlik tarixi olan məktəbin əsas binasını Hacı Zeynalabdin Tağıyev tikdirib. Bu məktəb bir çox tarixi hadisələrin şahidi olub. Buna görə də tədbirə "100 ilin şahidi" adı verilib. Məktəbin bir çox məzunları həm ölkəmizdə, həm də xaricdə fəaliyyət göstərən tanınmış insanlardır. Azərbaycanı layiqincə təmsil edirlər.

Tədbir Dövlət Himninin səsləndirilməsi və Vətən şəhidlərinin əziz xatirəsinin bir dəqiqəlik sükutla yad edilməsi ilə başlayıb. 

Məktəbin gənc direktoru Əzizə Abasova gələn qonaqları salamlayaraq tədbiri açıq elan edib. 

Şagirdlər bir əsrlik tarixi olan məktəbin fəaliyyətini hazırlanmış səhnələrdə canlandırıblar. Məktəbdən məzun kimi ayrılan bəzi şagirdlər bu məktəbə yenidən qayıdaraq müəllim kimi fəaliyyətə başlayıblar. Bu müəllimlər haqqında da slayd nümayiş olunub.

Tədbirdə Bakı Şəhəri üzrə Təhsil İdarəsinin müdir müavini Anar Məmmədov, millət vəkili Nigar Arpadarayi, Azərbaycan Respublikası Konstitusiya Məhkəməsinin Konstitusiya hüququ şöbəsinin müdiri Dürdanə Məmmədova, tanınmış müğənni, bəstəkar Akif İslamzadə, aktrisa Gülşad Baxşıyeva çıxış edərək məktəblə bağlı xatirələrini bölüşüblər. Tədbirdə məktəbdə 46 il müəllim və tərbiyə işləri üzrə direktor müavini vəzifəsində işləmiş Nurməmməd Laçınov da qonaqlar arasında idi.

Əziz və doğma məktəb, 100 yaşın mübarək! 

Martın 16-da məktəbdə "Dəyərlərimizi qoruyaq" adlı ədəbi-bədii kompozisiya keçirilib. Milli ruhda bəzədilmiş foyedə al-əlvan geyinmiş şagirdlərin əllərindəki səməni, nərgiz gülü, xonça baharın gəlişindən xəbər verirdi. Şagirdlərimiz Novruz bayramı ilə bağlı şeirlər, bayatılar ifa edib, səhnəciklər göstəriblər. Tədbirdə Novruz bayramının tarixindən, Su, Od, Yel, Torpaq çərşənbələri ilə bağlı adət-ənənələrdən, mərasimlərdən söz açılıb. Kosa ilə Keçəlin gəlişi, duzlu-məzəli çıxışları tədbir iştirakçılarında ruh yüksəkliyi yaradıb. Şagirdlər Novruz atributlarını, ənənələrini əks etdirən səhnəciklər, yarışlar keçiriblər.

Sonda məktəbin foyesində şagirdlərimiz bahar bayramı ilə bağlı əl işlərindən ibarət sərgiyə tamaşa ediblər. 

Martın 16-da məktəbin riyaziyyat müəllimi Sevinc Əliyeva V siniflərə Novruz bayramının tarixi, adət-ənənələri haqqında mühazirə oxuyub. Şagirdlərin ifasında bayrama həsr olunmuş şeirlər, bayatılar səsləndirilib.

Sonda Sevinc müəllimə şagirdləri bayram münasibətilə təbrik edib, xoş sözlər söyləyib. 

  Martın 13-də sinif rəhbəri Həcər Əliyevanın rəhbərliyi ilə "Dəyərlərimizi qoruyaq" adlı dəyirmi masa keçirilib. Tədbirdə milli ruhumuzu və mənəvi dəyərlərimizi bütün çalarları ilə özündə əks etdirən şifahi xalq ədəbiyyatımızdan nümunələr təqdim edilib. Xalqımızın mənsubluğunu özündə əks etdirən "Kitabi-Dədə Qorqud" dastanının beynəlxalq aləmdə tanıdılmasında ulu öndər Heydər Əliyevin xidmətlərindən danışılıb. Milli-mənəvi dəyərlərimizi əks etdirən ədəbi-bədii kompozisiya təqdim olunub.

  Məktəbdə milli bayramımızla əlaqədar "Novruzda təbiət" adlı sərgi keçirilib. Sərgidə "Novruz"un əsas atributlarını əks etdirən əsərlər nümayiş etdirilib. Həmçinin hər bir şagirdin öz bədii-estetik baxışlarını əks etdirən əl işləri təqdim edilib. Nümayiş olunan əsərlər içərisində milli geyimlər, mis qablar şagirdlərdə xoş ab-hava yaradıb.