Müsabiqə qaliblərinin mükafatlandırma mərasimi keçirilib
Bakı Şəhəri üzrə Təhsil İdarəsi (BŞTİ) tərəfindən ““Kiçik Akademiya” üzvləri arasında tədqiqatçılıq”, “Kiçik tədqiqatçılar” və “Gəlin tanış olaq!” müsabiqələri qaliblərinin mükafatlandırılma mərasimi keçirilib.
Mərasimdə BŞTİ-nin müdiri Rəşad Tağıyev, İdarənin müvafiq struktur bölmə rəhbərləri, məktəb direktorları, müəllimlər, valideynlər və şagirdlər iştirak ediblər.
Tədbiri giriş sözü ilə açan BŞTİ-nin müdiri Rəşad Tağıyev qalib komandaları təbrik edib və belə müsabiqələrin keçirilməsinin şagirdlərin istedad və qabiliyyətlərinin inkişaf etdirilməsində, təlimə motivasiyasının yüksəldilməsində mühüm rolu olduğunu diqqətə çatdırıb.
Rəşad Tağıyev istedadlı şagirdləri vaxtında aşkara çıxarmaq, onları daim həvəsləndirmək, yaradıcılığa və elmə olan marağını artırmaq, nəzəri və təcrübi biliklərini təkmilləşdirmək, şagirdlərində tədqiqatçılıq bacarıqlarını inkişaf etdirmək, onların məntiqi biliklərinin artmasına təkan vermək, məktəblilər arasında sağlam rəqabət mühiti yaratmaq məqsədilə Təhsil Nazirliyi və BŞTİ tərəfindən il ərzində bir çox müsabiqələr təşkil edildiyini bildirib.
Məktəbin IX “A” sinif şagirdi Qəndab Bağırova “Kiçik Akademiya” üzvləri arasında tədqiqatçılıq müsabiqəsində fəal iştirakına görə tərifnamə ilə təltif olundu. Məktəb kollektivi Qəndab Bağırlını təbrik edir uğurlarının davamlı olmağını arzu edir.
