Şagirdlərimiz "Soyuq əllər,isti ürəklər"yarmarkasında iştirak ediblər.
Məktəbimizin 8a sinif şagirdləri "Soyuq əllər,isti ürəklər" yarmarkasında iştirak ediblər. 8a sinif şagirdləri və sinfin rəhbəri Hacıyeva Səadət müəllimə uğurlar arzu edirik.
Bakıya Yeni il abu-havasını gətirən ənənəvi tədbirlərdən biri-Fəvvarələr meydanında təşkil edilən “Soyuq əllər, isti ürəklər” xeyriyyə yarmarkasının açılışı olub. Beşinci ildir keçirilən yarmarka çərçivəsində meydanda qurulan 46 kiçik taxta “ev” qarşıdan gələn ilin simvolikasına uyğun bəzədilib. Bu köşklərdə şəhər sakinlərinə və qonaqlara suvenirlər, şirniyyat, ətriyyat, oyuncaqlar, yolka bəzəkləri təklif olunur.
Bu ilki tədbir miqyasına və çoxsaylı sürprizlərinə görə əvvəlkilərdən fərqlidir. Yarmarka çərçivəsində təşkil edilən əyləncəli proqramlarda insanlar əylənməklə yanaşı, Yeni il hədiyyələri də ala bilirlər. Yarmarka təkcə paytaxt sakinlərinin deyil, dünyanın müxtəlif ölkələrindən Bakıya gələn turistlərin də marağına səbəb olub.
Yarmarka keçirilən günlərdə satışa müxtəlif şirkətlərin məhsulları ilə yanaşı,ötən il olduğu kimi, internat məktəblərinin yetirmələrinin hazırladığı məmulatlar da çıxarılıb. Burada toplanan vəsait xeyriyyə işlərinə sərf ediləcək. Müalicə və əməliyyata ehtiyacı olan uşaqlara, eləcə də aztəminatlı ailələrə yardım göstəriləcək. Yarmarka 2018-ci yanvarın 15-dək davam edəcək.
