Eldəniz Zeynalovun 80 illik yubiley gecəsi
27 oktyabr 2017-ci il tarixində Bakı şəhəri Mədəniyyət və Turizm Baş İdarəsinin təşkilatçılığı və Xəzər rayonu İcra Hakimiyyətinin dəstəyi ilə Mərdəkan Mədəniyyət Sarayında görkəmli aktyor, respublikanın xalq artisti Eldəniz Zeynalovun anadan olmasının 80 illiyi münasibəti ilə yubiley gecəsi keçirildi. Tədbirdə sənətkarla bir səhnəni paylaşmış tərəfmüqabilləri, elm ,mədəniyyət və incəsənət xadimləri, aktyorun ailə üzvləri və Xəzər rayonu ictimaiyyətinin nümayəndələri ilə yanaşı məktəbimizin müəllim və şagird kollektivi də iştirak etmişdir. Tədbirdə çıxış edən Xəzər rayonu Ağsaqqallar Şurasının sədri Təvəkkül Səlimov bildirdi ki, tanınmış mədəniyyət və incəsənət xadimlərinin yubiley tədbirlərinin keçirilməsi ənənəsinin əsası ümummilli lider Heydər Əliyev tərəfindən qoyulmuşdur və bu gün də sənət adamlarına qayğı və diqqət uğurla davam etdirilir. Yubiley gecəsində şagirdlərimiz tədbirə gələnlərlə birgə sənətkarın həyat və yaradıcılığı, teatr və kino sahəsində yaratdığı obrazlardan ibarət foto sərgi ilə tanış oldular və onun rol aldığı filmlərdən ibarət fraqmentlərin nümayişini izləyə bildilər. Tədbir Eldəniz Zeynalovun 80 illik yubileyinə həsr olunan konsert proqramı ilə davam etdi.
