Əsgər məzun Məmmədov Vüsət Ənvər oğlu
Məmmədov Vüsət Ənvər oğlu 17.07.1997-ci il tarixində Bakıda ziyalı ailəsində anadan olmuşdur. 2003-cü ildə Binəqədi rayonu R.Əliyev adına 3 saylı tam orta məktəbin 1-ci sinfinə daxil olmuş, 2014-cü ildə həmin məktəbin 11-ci sinfini bitirmişdir. Məktəbdə təhsil aldığı illər ərzində müxtəlif tədbirlərdə iştirak etmiş, nailiyyətlər əldə etmişdir. İbtidai sinfi müvəffəqiyyətlə başa vurduqdan sonra Fizika, Riyaziyyat, İnformatika təmayüllü liseyə daxil olmuş, 9-cu sinfə qədər orda təhsil almış, bir çox layihələrdə, intellektual yarışlarda iştirak etmiş, nailiyyətlər əldə etmişdir. Eyni zamanda Ülviyyə Hacılının "Davamçılar" kitabında haqqında məqalə çıxmışdır. 2012-ci ildə yenidən R.Əliyev adına 3 saylı tam orta məktəbə qayıtmış, təhsilini burda başa vurmuşdur. 2014-cü ildə ali məktəbə daxil olduqdan sonra müxtəlif təşkilatlarda fəaliyyət göstərmiş, ölkəmizdə keçirilən beynəlxalq yarışlarda könüllü iştirak etmişdir. Ali məktəbi başa vurduqdan sonra, 2018-ci ildə həqiqi hərbi xidmətə getmişdir. Həqiqi hərbi xidməti başa vurduqdan sonra AFFA-da işə başlamışdır.
2020-ci il 27 sentyabr tarixində başlayan Vətən müharibəsi ilə əlaqədar olaraq Ali Baş komandanın qismən səfərbərlik elan etməsilə 29 sentyabr tarixində xidmətə yollanmışdır. 2020-ci il 29 sentyabrdan 2021-ci il 10 yanvar tarixinədək Qarabağ korpusunun N saylı hərbi hissəsinin tərkibində müxtəlif sərhədboyu rayonlarda artilleriya qoşunlarında xidmət etmişdir. 44 günlük Vətən müharibəsi dövründə Gəncə, Şəmkir, Tovuz, Daşkəsən,Kəlbəcər rayonlarında olmuşdur. 2021-ci il yanvarın 10-da tərxis edilmişdir.
