Nəsrəddin Tusi
Görkəmli alim Nəsrəddin Tusinin anım günü ilə bağlı tədbir keçırilib. Tədbir məktəbimizdə riyaziyyat dərsini tədris edən Səbinə müəllimin təşkilatçılığı, 8 "A" sinif şagirdlərinin iştirakı ilə baş tutub. Tədbirdə şagirdlər qeyd ediblər ki, Nəsirəddin Tusi elmin müxtəlif sahələri ilə dərindən maraqlanmışdır. Onun qələmindən çıxan yüzdən artıq ciddi əsər elmin astronomiya, riyaziyyat, fizika, tibb, fəlsəfə, etika, məntiq və digər sahələrinə həsr olunmuşdur. N. Tusinin yaradıcılığında astronomiya və riyaziyyat üzrə tədqiqatlar xüsusi yer tutur. Tusi bu sahələrdə aparılmış iyirmidən artıq uğurlu araşdırmanın müəllifidir. Riyaziyyata həsr etdiyi əsərlər yalnız ərəbcə, astronomiya üzrə tədqiqatları isə həm fars, həm də ərəb dillərində yazılmışdır. Həmçinin qeyd edildi ki, riyaziyyatçı alimin ən məşhur əsərləri arasında "Şəklül-qita" ("Bütöv çoxtərəfli haqda risalə"), "Came'ül-hesab" ("Lövhə və tozun köməyi ilə hesab toplusu"), "Dairənin ölçüsü", "Təhrir Öqlidis" ("Evklid "Başlanğıc"ının təsviri") kimi kitablar xüsusi yer tutur. Dörd hissədən ibarət "Zici-İlxani" ("İlxanilərin astronomik cədvəlləri") əsəri isə alimin adını dünya astronomiya tarixinə salmışdır. Tədbir çox maraqlı və yaddaqalan olub.
