Məntiq yarışı və rəsm sərgisi
Bu gün məktəbimizdə şagirdlərin Fövqaladə Hallar Nazirliyinin yaranmasının 13 illiyinə həsr edilmiş məntiq yarışı və rəsm əsərlərinin sərgisi keçirildi. Məktəbin direktoru Südabə Abdullayeva, Suraxanı rayonu üzrə Fövqaladə Hallar və Mülki Müdafiə şöbəsinin rəisi mayor Toğrul Vəliyev, direktor müavini Rəna Əbilova, psixoloq Raida Xidirova, riyaziyyat müəllimi Mirvari Məmmədova, ibtidai sinif müəllimi Səbinə Axundlu münsiflər heyətində əyləşmişdilər. Əvvəlcə ibtidai sinif şagirdləri müxtəlif qruplara bölündülər. Qruplar riyazi fiqurların adı ilə adlandırılmışdı. “Trapesiya”, "Düzbucaqlı", “Romb”, “ Kvadrat” və “Üçbucaq” qrupları fəal yarış nümayiş etdirdilər. Yarışın mərhələləri arasında şagirdlərimiz gözəl rəqslərlə çıxış etdilər. Onlar üzərində Azərbaycan bayrağı əks olunmuş xüsusi geyimdə “Bayraq rəqsi” oynadılar. Müxtəlif şeirlər səsləndirildi. Yarışın sonunda Südabə xanım Abdullayeva təşkilatçılara və iştirakçılara öz minnətdarlığını bildirdi. Mayor Toğrul Vəliyev I yerin qalibi “Kvadrat”, II yerin qalibi “Üçbucaq” və III yerin qalibi “Düzbucaqlı” qruplarına müxtəlif hədiyyələr təqdim etdi. Yer qazana bilməyən qruplara isə həvəsləndirici mükafatlar verildi.
