266 №-Lİ TAM ORTA MƏKTƏB

     “Yaşıl dünya naminə həmrəylik ili”nə aid Tədbirlər Planına uyğun olaraq Azərbaycanın ən ucqar şərq nöqtəsində yerləşən Abşeron Milli Parkına ekskursiya  təşkil edildi. Ekskursiyada şagirdlərə ətraf mühitin mühafizəsi, ondan səmərəli istifadə edilməsi, Milli Parkda qorunub saxlanan nadir fauna və flora növləri barədə məlumat verildi.  

     Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi ilə bağlı məktəbin Tədbirlər Planına uyğun olaraq ekoloji dünyagörüşünün,  təbiəti öyrənmə və tədqiqatçılıq bacarıqlarının inkişaf etdirilməsi məqsədilə beşyaşlılar və ibtidai sinif şagirdləri ilə açıq havada əlavə məşğələlər keçirildi.

     “12 aprel – Ümumdünya Aviasiya və Kosmonav Günü” münasibəti ilə Azərbaycan Respublikasında kosmik sənayinin inkişafı barədə şagirdlərlə maarifləndirici görüş keçirildi və Milli Aviasiya Akademiyasına ekskursiya təşkil edildi. Görüşdə “Azərkosmos”un əməkdaşı Murad Məmmədov şagirdlərə Azərbaycan Respublikası Prezidentinin Sərəncamı ilə 2008-ci ildə Azərbaycanda aerokosmik sənayenin yaradılması, inkişaf etdirilməsi və uğurları barədə məlumat verdi. Müasir dövrdə ölkəmizdə yeni innovasiyada əsaslanan və mühüm inkişaf yolu keçən sahələrdən birinin məhz kosmik sənaye sahəsinin olması, 74-cü Beynəlxalq Astronavtika Konqresinin  2023-cü ildə Bakıda keçirilməsi  barədə şagirdlərə geniş məlumat verildi.

     Milli Aviasiya Akademiyasında şagirdlər Akademiyanın tədris strukturu ilə tanış  oldular. Şagirdlərə Azərbaycanın strateji əhəmiyyətə malik aerokosmik sahəsi, o cümlədən mülki aviasiya və bir sıra digər sahələr üzrə mütəxəssislərin hazırlanması barədə məlumat verildi.

     Məktəbin Peşə Təmayüllü sinif sagirdlərinin hazırladıqları qida məhsullarından ibarət Satış Yarmarkası keçirildi. Yarmarkada məktəb rəhbərliyi, müəllim və valideyn kollektivi iştirak etdilər.

     Azərbaycan Dövlət Mədəniyyət və İncəsənət Universiteti nəzdində fəaliyyət göstərən Corkestri məktəbimizin qonağı oldu. İnteraktiv konsert-görüşdə Azərbaycan və dünya bəstəkarlarının əsərləri səsləndirildi, orkestrin üzvləri şagirdləri musiqi alətləri ilə tanış etdilər.

Musiqi maarifçiliyinə dair interaktiv oyunlar təşkil edildi.