Zəfər Günü münasibəti ilə tədbir
Noyabrın 5-də məktəbimizdə Zəfər Günü münasibətilə tədbir keçirildi. Məktəbin direktoru Könül Məmmədli qonaqları: qəsəbə nümayəndəliyinin sədri Emin Əliyevi, məktəbimizin şəhid məzunu Emin Əliyevin anası İbadət xanım Əliyevanı, şairə Gülarə Munisi, müharibə iştirakçıları olan məzunlarımızı salamlayaraq onları müzəffər ordumuzun şanlı zəfər yürüşünü əks etdirən muzey-guşə ilə tanış etdi. Balaca xanəndələrimizin ifasında "Qarabağ şikəstəsi"ni dinlədikdən sonra qonaqlar şagirdlərimizin əl işləri və rəsm əsərlərindən ibarət sərgiyə tamaşa etdilər. Daha sonra isə qonaqlar peşə təmayüllü sinfin "Aşpaz köməkçisi" qrupunun Zəfər Gününə həsr olunmuş dərsində iştirak etdilər.
Tədbirin ədəbi-bədii hissəsi Azərbaycan Respublikasının Dövlət Himninin möhtəşəm sədaları altında açıldıqdan sonra məktəbin direktoru Könül Məmmədli 44 günlük Vətən müharibəsində qələbəmizi xalqımızın ən böyük tarixi qələbəsi kimi dəyərləndirdi və bu qələbədə illərlə məktəblərdə şagirdlərin vətənpərvərlik, eləcə də hərbi vətənpərvərlik tərbiyəsi ilə məşğul olan Azərbaycan müəllimlərinin danılmaz rolunu vurğuladı. Azərbaycanın müstəqilliyi, sərhədlərimizin toxunulmazlığı, torpaqlarımızın bölünməzliyi uğrunda qurban getmiş şəhidlərimiz bir dəqiqəlik sükutla yad edildi. İfa etdikləri şeirlər və mahnılar, göstərdikləri səhnəciklər şagirdlərin xalq-prezident-ordu birliyi nəticəsində - "dəmir yumruq" sayəsində əldə etdiyimiz böyük zəfərdən doğan sevinc, qürur və fərəhindən xəbər verirdi. Tədbirin "Qarabağ inciləri" süitası, müxtəlif siniflərdə oxuyan şagirdlərin birlikdə rəqsi ilə yekunlaşması "Qarabağ Azərbaycandır!" ifasəsinin sonunda qoyulan nida kimi möhtəşəm idi . Tədbirin sonunda çıxış edən hər kəsin, xüsusilə 44 günlük şanlı Vətən müharibəsinin qəhrəmanlarının çıxışları xalqımızın mübariz ruhunu əks etdirirdi.
