Şagirdlərimiz Buzovna şəhidlərini ziyarət ediblər
İyunun 18-də məktəbimizin 4b sinif şagirdləri Buzovna şəhidlərini ziyarət ediblər. Sinif rəhbəri Mətanət Əliyeva ilə birlikdə şəhidlərin bir vaxtlar yaşadıqları əraziyə, evləri önünə, daha sonra isə uyuduqlari məzarlığa gedən şagirdlər gətirdikləri gül-çiçəklərlə şəhidlərə olan ehtiramlarını ifadə ediblər. Əvvəlcə şəhid Heybətov Ağaəmi Elçin oğlunu ziyarət edən şagirdlər şəhidin xatirə lövhəsi önündə Azərbaycan Respublikasının dövlət himnini oxuduqdan sonra onun xatirəsini bir dəqiqəlik sükutla yad ediblər. Şəhidin əzizləri : anasi, bacısı ilə tanış olan şagirdlər onların Ağaəmi haqqında xoş xatirələrini dinləyiblər. Sonra uşaqlar Əliyev İbrahim Nəcəfqulu oğlunun və Salamov Vüsal Yəhya oğlunun da evini ziyarət ediblər. Daha sonra müəllim şagirdlərini Buzovna şəhidlərinin əbədi uyuduqları məzarlığa gətirib. Şagirdlər I və II Qarabağ savaşının şəhidlərinin, o cümlədən məktəbimizin şəhid məzunlarının: Emin Əliyev, Emil Aşumov və Elşad Bünyadovun məzarlarının önündə ehtiramla baş əyiblər, məktəbimizin Emin Əliyevin adını daşıması ilə qürur duyduqlarını bildiriblər.
Bu ziyarətdən üzündə yorğunluq, gözlərində isə ürəklərindəki böyük vətənpərvərlik hissinin parıltısı ilə geri dönən şagirdlərimizi görmək necə də qürurverici idi.
