Şəhidin anım günü qeyd olundu.
Məktəbin məzunu 2023-cü ilin sentyabr ayının 19-da antiterror əməliyyatları zamanı şəhidlik zirvəsinə yüksələn Savalan Qafarovun şəhadətə ucalmasından bir il ötür.
19.09.2024-cü il tarixində şəhidin ailə üzvləri, rayon ictimaiyyəti, 218 nömrəli tam orta məktəbin müəllim və şagird heyətinin iştirakı ilə şəhid Savalan Qafarovun məzarı ziyarət edilərək xatirəsi ehtiramla anılıb, məzarı üzərinə gül dəstələri düzülüb və ruhuna dualar oxunub. Eyni zamanda canlarını Azərbaycanın ərazi bütövlüyü uğrunda qurban vermiş Vətən müharibəsi şəhidlərinin əziz xatirələri bir dəqiqəlik sükutla yad edilib.
Çıxış edənlər şəhidin ailəsinə başsağlığı verib, Vətənimiz üçün ləyaqətli övlad böyütdüyünə görə şəhidin valideynlərinə təşəkkür etdilər və onlara səbr dilədilər. Müzəffər Ali Baş Komandanın rəhbərliyi ilə 44 günlük Vətən müharibəsində Azərbaycan Ordusunun qüdrətindən, şəhidlərimizin döyüş zamanı göstərdiyi qəhrəmanlıqlardan söz açılıb.
Prezident-ordu-xalq vəhdətinin, birliyinin, həmrəyliyinin nəticəsi olaraq torpaqlarımızın düşməndən azad edildiyi, haqq-ədalətin bərpa olunduğu, Şanlı Zəfər gününün tariximizə şəhidlərimizin qanı ilə yazıldığını bildirib. Üçrəngli bayrağımızın respublikamızın bütün guşələrində olduğu kimi, işğaldan azad edilmiş torpaqlarımızda da əzəmətlə dalğalandığı vurğulanıb.
