209 №-li tam orta məktəb

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində 27 sentyabr Anım Günü ilə bağlı tədbirlər təşkil olunub.

Ümumi təhsil müəssisələrində Anım Günü ilə bağlı konfrans, seminar, mühazirə, “Dəyirmi masa”, vebinar, açıq dərslər, ədəbi-bədii kompozisiyalar, foto və rəsm sərgiləri, yaradıcılıq müsabiqələri, intellektual oyunlar, fləşmob və idman yarışları keçirilib.

Qalibiyyət və vətənpərvərlik ruhunda təşkil edilən tədbirlərdə Vətən Müharibəsi şəhidlərinin əziz xatirəsi bir dəqiqəlik sükutla yad edilib, 27 sentyabr Anım Günü barədə şagirdlərə ətraflı məlumat verilib. Bildirilib ki, Vətən Müharibəsi Azərbaycan gəncliyinin yüksək vətənpərvərlik ruhunda yetişməsinin əyani təsdiqi kimi xalqımızın tarixinə qızıl hərflərlə yazılıb. Vətənimizin suverenliyi və ərazi bütövlüyü uğrunda mübarizədə qəhrəmanlıq göstərən əsgər və zabitlərimiz, arxa cəbhədə çalışan vətəndaşlarımız, bütövlükdə xalqımız sarsılmaz əzm və iradə nümayiş etdirərək, dəmir yumruq kimi birləşərək Vətən Müharibəsində tarixi Zəfəri təmin ediblər. Bu şanlı Qələbəyə gedən yolda canından keçərək əsl qəhrəmanlıq nümunəsi sərgiləyən Vətən övladlarının xatirəsinin yad olunması üçün Prezident İlham Əliyevin Sərəncamı ilə sentyabrın 27-si Azərbaycanda Anım Günü kimi təsis olunub.

Qeyd edək ki, BŞTİ-nin tabeliyindəki ümumi təhsil müəssisələrində Vətən Müharibəsində qəhrəmanlıq göstərən əsgər və zabitlərlə, qazilərlə, şəhidlərin ailə üzvləri ilə görüşlər keçirilib, onların həyat və mübarizə yolunu əks etdirən videoçarxlar nümayiş olunub.

Bundan başqa, şagirdlərin Vətən Müharibəsi Memorial Kompleksinə ekskursiyaları təşkil olunub, həmçinin təhsil müəssisələrində şəhidlərin xatirəsinə həsr olunmuş ağacəkmə aksiyaları da keçirilib.

"Torpağımın hər qarışı əzizdir!" adlı layihənin davamı olaraq sentyabrın 21-də I-lX sinif şagirdlərinin hazırladığı vətənə, ölkəmizə aid şeirlər səhər xəttində səsləndirildi. Layihənin nəticəsi olaraq, istedadı ilə seçilən şagirdlər sonda məktəb rəhbərliyi tərəfindən mükafatlandırılacaqdır.

Sentyabrın 21-də Təhsildə İnkişaf və İnnovasiyalar üzrə VI QRANT müsabiqəsində məktəbin direktoru Səbahət Ağayevanın fərdi layihələr kateqoriyası üzrə qalib gəldiyi “STEAM dərslərində Minecraftdan istifadə" adlı layihənin məktəbdə açılış tədbiri keçirildi. Tədbirdə məktəbin direktoru Səbahət Ağayeva, təhsil eksperti Əli Məmmədov və təlimçi Təranə Nuriyeva iştirak edirdi. Tədbirdə iştirak edənlər layihənin məqsədindən danışıb qeyd etdilər ki, layihədə qarşıya qoyulan əsas vəzifələr tətbiq ediləcək innovativ tədris metodlarından istifadə edərək şagirdlərin təhsilə marağının artırılması, bu şagirdlərin cəmiyyətimizə sağlam şəkildə adaptasiyasını sürətləndirib, bu prosesə töhfə vermək, layihə istirakçılarının asudə vaxtlarının səmərəli keçirilmələrini təşkil edib, onları zərərli vərdişlərdən yayındırmaq, Azərbaycanımıza, dövlətçiliyimizə layiqli vətəndaşlar kimi formalaşmalarında az da olsa pay sahibi olmaqdır.

Sentyabrın 20-də məktəbin 1 a sinif müəllimi Rəhilə Məlikovanın rəhbərliyi ilə sinif valideyn iclası keçirildi. İclasda məktəb rəhbərliyi də iştirak edirdi. Məktəbin direktoru Səbahət Ağayeva çıxış edərək, dərs ilinin başlanması ilə əlaqədar olaraq təhsil və təlimlə bağlı məsələləri valideynlərin nəzərinə çatdırdı. Sonda iclasda tədrisin daha da uğurlu olması üçün valideynlərin qarşısında dayanan vəzifələr müzakirə olundu.

Sentyabrın 20-də məktəbdə "Torpağımın hər qarışı əzizdir" adlı səhər xətti keçirildi. I-lX sinif şagirdlərinin birgə hazırladığı "Torpağımın hər qarışı əzizdir" adlı səhər xətti nümayiş etdirildi. Səhər xəttində vətənə, ölkəmizə aid şeirlər səsləndi. Sonda məktəb rəhbərliyi tərəfindən ibtidai sinif müəllimlərinin sertifikatlaşdırılması imtahanının test və müsahibə mərhələsindən uğurla keçən müəllimlər təbrik edilərək onlara fəaliyyətlərində uğurlar arzulandı.