Şəhid ailələri ilə görüş
Məktəbdə tez - tez şəhid ailələri ilə görüşlər təşkil edilir. Şəhid adı verdiyimiz sinif otaqlarında təhsil alan şagirdlər müəllimlərin, məktəb rəhbərliyinin təşəbbüsü ilə həmin şəhidlərin ailələrini ziyarət edir, onların anım və doğum günlərini birlikdə keçirirlər.
Belə şəhid qəhrəmanlarımızdan biri, Vətən müharibəsi iştirakçısı Aqil Mirzəliyevdir. Məktəbin Aqil Mirzəliyev adına 1 "A" sinif şagirdləri noyabrın 7 - də sinif müəllimi Səfiyyə Vəliyevanın rəhbərliyi, direktor müavini Kəmalə Piriyeva, məktəbin müəllimi Arifə Dadaşova və bir qrup valideynin iştirakı ilə şəhidin doğulub boya - başa çatdığı İsmayıllı rayonuna yollanıblar.
Əvvəlcə şəhidin evinə gedən məktəb kollektivi Aqilin ev muzeyində olub, anası Aynurə Mirzəliyevanın dilindən oğlunun igidlk dastanın eşidib, qürurverici anlar yaşayıblar. Daha sonra qəhrəman şəhidin İsmayıllı rayon Şəhidlər Xiyabanında məzarı ziyarət edilib, qəbri üstünə əklil qoyulub, tər qərənfillər düzülüb. Şagirdlərin ifasında vətənpərvər mövzuda şeirlər səsləndirilib.
