Bilik gününü qeyd edirik
Məktəbimizdə təşkil edilən “Bilik günü” nə həsr olunmuş tədbir öz xoş ovqatı və rəngarəngliyi ilə yəqin ki, birincilərin və onların valideynlərinin yaddaşında əbədi qalacaq. Tədbirdə birincilər, onbirincilər, valideynlər, BŞTİ – nin Ümumtəhsil sektorunun müdiri Samirə Bektaşi iştirak edirdilər.
Azərbaycan Respublikası Dövlət Himninin səslənməsi ilə başlayan tədbirdə məktəbin direktoru Ceyran Kuliyeva valideynləri, şagirdləri təbrik edərək, 2019/2020–ci tədris ilində məktəbin qazandığı uğurlar barədə məlumat verdi, yüksək bal toplayaraq tələbə adı qazanan şagirdlərə uğurlar dilədi. Direktor öz çıxışında əsası Ulu Öndər tərəfindən qoyulan və bu gün də, Azərbaycan Respublikasının Prezidenti cənab İlham Əliyev, eləcə də, I vitse Prezident Mehriban xanım Əliyeva tərəfindən ölkəmizdə təhsilə olan xüsusi diqqət və qayğıdan söz açdı. Təhsil sektorunun müdiri Samirə Bektaşi təhsil sahəsində aparılan islahatların, təhsil infrastrukturunun müasir tələblər səviyyəsində qurulmasının, təhsilin məzmunundakı köklü dəyişikliklərin cəmiyyətimizin və xalqımızın gələcək taleyində mühüm rol oynadığını bildirdi. Birinciləri təbrik edən Samirə xanım məktəb seçimində valideynlərə düzgün seçim etdiklərini bildirməklə yanaşı, müəllimlərə valideyn etimadının doğruldulması üçün daha əzmlə çalışmalarını tövsiyyə etdi.
İlk zəngin sədaları altında birincilər sinif otaqlarına üz tutdular. Beləcə, məktəbimizdə 2019/2020-ci tədris ili başlamış oldu. Bütün kollektivə yüksək məsuliyyət, uğur və nailiyyətlər arzulayırıq!
