Nəsiminin 650 illiyinə həsr olunmuş “Simadan asimana”
Məktəbimizdə Azərbaycan xalqının ümumbəşər mədəniyyətinə bəxş etdiyi qüdrətli söz ustadı Nəsiminin 650 illiyinə həsr olunmuş“Simadan asimana” adlı tədbir keçirildi. Mütəfəkkir şairin dövrün elmi-fəlsəfi düşüncəsinin aydın ifadəçisinə çevrilmiş müstəsna əhəmiyyətli ədəbi irsinin qədim köklərə və çoxəsrlik ənənələrə malik Azərbaycan ədəbiyyatı tarixində xüsusi mərhələ təşkil etməsi barədə şagirdlərə məlumat bu mövzuya həsr olunmuş maraqlı video-çarx nümayişi ilə təqdim olundu. Şagirdlərin ifasında musiqinin müşaiəti ilə Nəsimi poeziyasından səslənən nümunələr tədbir iştirakçıları tərəfindən rəğbətlə qarşılandı. Nəsimi yaradıcılığının tədqiqatçısı İsa Muğannanın yadigarı Sevinc Muğanna, “Nəsimi” filmindən tanıdığımız dərviş rolunun ifaçısı Şeyx Əbdül Mahmudov və Fatma obrazının yaradıcısı Xalidə xanım Quliyeva da bu tədbirə qatılmışlar. Nəsimi filmindən göstərilən bəzi fraqmentlər aktyor – qonaqların filmin çəkilişi barədə maraqlı xatirələri ilə müşaiət olundu. Tədbirin sonunda çıxış edən direktor məktəblilərin Azərbaycan mədəniyyəti, tarixi, incəsənətinə dərindən yiyələnmələrinin vacibliyindən, ölkə başçısı tərəfindən bu məqsədlə verilən çoxsaylı sərəncamların icrasının önəmindən söz açdı.
